Coronavirus: As medidas preventivas nótanse xa na menor presenza de persoas nas rúas

Un paseo polas principais rúas do centro histórico de Santiago revelan un sentir xeral que transmite tranquilidade e prudencia a partes iguais. A cidadanía segue transitando as beirarrúas mentres os turistas, aínda que en menor medida, continúan fotografando cada recuncho, tenda ou contorna digna de postal.

Os repartidores, dependentes ou empregados que traballan cara ao público tampouco cesaron na súa rutina. O Mercado de Abastos, por exemplo, foi un dos establecementos que abriron as súas portas con normalidade.

A maioría dos comerciantes que teñen un negocio alí contaban con produtos frescos esta mañá de venres. Verduras, froitas, peixe, carne e outros alimentos enchían os mostradores destes negocios que con maior prema baleirábanse nos supermercados do Ensanche.

Por algunha razón o papel hixiénico é un dos produtos que deixan o oco máis grande nos andeis destes negocios, mentres que atopar desinfectantes de mans convértese nunha tarefa máis que complicada nas farmacias santiaguesas.

O estado de alarma tamén provocou que o alcalde de Santiago, Xosé Sánchez Bugallo, anunciase hoxe que os mercados de Salgueiriños e Amio pechan as súas portas ata que termine esta situación. Pola súa banda, o de Abastos seguirá en funcionamento para cubrir as necesidades de abastecemento da poboación.

Esta mesma poboación é a que segue ocupando a vida pública dunha cidade que se desenvolve entre rúas estreitas e chans empedrados, hoxe iluminados polo sol. Quizais estes raios medio primaverais motivaron que as persoas paseasen, mantendo as distancias, durante a mañá de venres.

Outros poucos, pola contra, preservan o costume de camiñar da man ou de gancho, aínda que a maioría deixan eses xestos para outros momentos nos que o contacto físico volva ser un hábito. Mentres tanto, a mesma premisa repítese en diferentes bocas con outras palabras: "daríache un abrazo, pero mellor non"; "non te achegues moito que che contaxio" e outra clase de saúdos que se mesturan coa ironía e a responsabilidade social.

A pesar de que non rende o pánico, todas as conversas versan sobre o mesmo: o coronavirus. Un home e unha muller que se atoparon na rúa teñen claro que "xa tiñan que pechar a comunidade de Madrid", mentres que outros se preguntan se ao final non van poder saír de casa ou "que é o que vai pasar".

VIGO

O peche dos colexios e centros de educativos, a suspensión de actividades e o resto de medidas preventivas para evitar unha posible expansión do coronavirus empezan a notarse no pulso diario da cidade de Vigo e, segundo explicaron fontes da Policía Local, traducíronse nun menor volume de tráfico e en menor presencia de viandantes polas rúas.

As medidas anunciadas nas últimas horas polo alcalde da cidade, Abel Caballero, como o peche de instalacións municipais (escolas infantís e outros centros docentes, bibliotecas, museos ou dotacións deportivas), reforzaranse a partir deste venres. Ademais, clausuráronse as celebracións da Reconquista.

Así, o rexedor anunciou en rolda de prensa que quedan clausurados todos os parques infantís da cidade, onde se instalarán precintos para evitar o seu uso. Tamén se establecen outras medidas restritivas, como limitar o número de persoas que usan os ascensores públicos instalados nalgunhas rúas, ou limitacións nas vodas oficiadas en locais municipais: prohíbese o acceso aos invitados, de modo que a cerimonia farase exclusivamente cos contraentes e dúas testemuñas.

O Concello anunciou tamén que se desinfectarán zonas da vía pública de gran concentración de persoas, mediante pulverizaciones, así como limpeza de elementos de contacto en escaleiras mecánicas.

A CORUÑA E PONTEVEDRA

Os efectos das medidas preventivas adoptadas para frear a expansión do coronavirus tamén se notan xa na cidade da Coruña cunha circulación como un día festivo e con menos afluencia de público aos comercios, segundo indicaron a Europa Press traballadores deste sector e tamén dos vinculados co ámbito do transporte.

Nas dependencias administrativas, a situación era similar. Seguíanse os protocolos de manter a distancia ás persoas que acudían a facer xestións, incluso pondo cadeiras diante dos mostradores para evitar que a persoa que facía a xestión se achegase. Informábase tamén de que o máximo de atención a cada persoa era de 15 minutos.

Con todo, algúns traballadores lamentaban non dispor de luvas ou máscaras, a pesar de ser algúns deles, por motivos de saúde, grupos de risco. "As medidas son cero", criticaron sobre aspectos que consideraban básicos como máscaras ou xel para limpar periodicamente as mans. Desde o sector do taxi incidiron tamén na apenas presenza de viaxeiros.

Ademais, as escalas de tres cruceiros que tiñan previsto atracar no porto da Coruña quedaron anuladas, segundo informa a Autoridade Portuaria da Coruña. Ademais, prohibiuse a atracada de cruceiros ata as 00.00 horas do 27 de marzo. 

No caso de Pontevedra, as rúas da cidade  rexistran este venres unha total normalidade, con presenza habitual de cidadáns en espazos públicos e mesmo gran cantidade de vehículos nos aparcadoiros disuasorios. Con todo, o avance do coronavirus está a afectar a todos os ámbitos da sociedade e, a partir deste fin de semana, boa parte dos locais de lecer nocturno pecharán as súas portas para contribuír á contención da pandemia.

OURENSE

A extensión do coronavirus e os efectos para a súa prevención déixanse notar xa entre os cidadáns de Ourense e afectan a farmacias, restaurantes, axencias de viaxe ou ximnasios, así como aos supermercados, onde se incrementou o consumo. O Concello da cidade xa anunciou o peche de todas as instalacións municipais, dos parques infantís e da piscina das Burgas.

A xente "está a volverse bastante tola, compra de todo", relata unha traballadora dun céntrico supermercado de Ourense, quen, admite, ve ao público "asustado" e que "non deixa de falar" do Covid-19. Esta situación vívese "desde hai tres ou catro días" e comeza a ser insustentable: "Estamos a pasalo mal, estano levando todo, preguntan por cousas e non as hai, non damos servizo e non nos dan servizo".

Conservas, leite, auga e, sobre todo, papel son os produtos máis demandados polos cidadáns. Unha empregada doutra tenda de alimentos relata como está a percibir esta "psicose sen xustificación", ve excesivo o 'saqueo' dos supermercados e percibe que a xente vai comprar por "medo".

Pola súa banda, as farmacias reciben estas xornadas no medio dun ambiente similar, de "preocupación", porque, como expón unha dependenta dunha botica situada na urbe ourensá, desde hai un mes e medio non lles "serven nin máscaras nin xeles nin alcol". Noutro comercio, entráronlles 40 máscaras, pero "desapareceron en dous días" tras unha "avalancha" de xente entre "onte e hoxe".

O mesmo panorama están a experimentar os restaurantes de Ourense, que terán que soportar "custos importantes" cun horizonte incerto no que deberán lidar cun acusado descenso de clientes, de "ata o 90%", segundo comenta un empresario que dispón de varios establecementos na cidade. Noutro coñecido mesón da urbe galega "a xente xa non chama" para reservar, senón para "anulacións", explica un empregado.

OFICINAS DA ADMINISTRACIÓN CAMBIAN OS HORARIOS

A Delegación do Goberno en Galicia informou da modificación horaria das oficinas de información e atención ao cidadán e rexistros da Administración Xeral do Estado en Galicia, situadas nas catro subdelegacións provinciais do Goberno. O horario de apertura será de 09,00 a 14,00 horas, no marco das medidas preventivas adoptadas para frear o coronavirus. Desde a Delegación do Goberno en Galicia lémbrase, ademais, aos cidadáns que dispoñen de canles telefónicas e telemáticas tanto para a consulta como para presentación de documentación oficial e pídese que restrinxan no posible o uso presencial destes servizos.

POSITIVO EN ESCOLA INFANTIL

A escola infantil da rede 'A Galiña Azul' de Esteiro, en Ferrol, foi clausurada pola Consellería de Sanidade tras recibir a confirmación dun caso positivo de coronavirus, comunicando de inmediato esta medida ás familias. Así o confirmaron fontes da Consellería de Política Social a Europa Press.

Deste xeito, asegúrase que "se trata dunha decisión que se adopta por precaución, pois as autoridades sanitarias indican que resulta cientificamente indicado a non transmisibilidade do virus nestas condicións". Política Social detallou que, no momento en que se coñeceu, pediuse "ás familias que acudan, coa maior celeridade posible, a recoller aos nenos que asistiron ao centro". Ademais, pediuse "desculpas ante as molestias ocasionadas".

ATRASO DE PROBAS UNIVERSITARIAS

A Comisión Interuniversitaria de Galicia (CIUG) emitiu este venres unha resolución na que apraza "ata novo aviso" os exames de acceso á universidade para maiores de 25 anos. A decisión tómase tendo en conta a situación actual creada pola epidemia de coronavirus, así como as recomendacións oficiais, e tendo en conta que se suspendeu a actividade no tres universidades galegas.

Por outra banda, a presidenta da Deputación de Pontevedra, Carmela Silva, e o vicepresidente da institución provincial, César Mosquera, compareceron este venres en rolda de prensa tras manter unha reunión co Comité de Seguimento do Covid-19, na que se estableceu como "prioridade" a atención ao Centro Príncipe Felipe.

SANTIAGO E FERROL

A partir do luns que vén iníciase un período de 14 días de suspensión de actividades lectivas e actividades extraordinarias, incluídas as gardarías, así como os centros sociocomunitarios.A cidade de Ferrol xa nota as medidas tomadas para evitar a propagación do coronavirus, coas rúas máis próximas ao Concello, en pleno barrio da Magdalena, cunha considerable diminución de transeúntes e os negocios de hostalaría con apenas clientes. Todos aqueles que non pode optar por traballar desde as súas casas están a atopar moitos menos problemas para poder circular polas estradas.

No propio Concello a actividade retardouse e en cada departamento algúns traballadores públicos están a finalizar tarefas para poder así non acudir aos seus postos de traballo, algo que tamén ocorre no ámbito político: os grupos municipais están baixo mínimos, tras tomar as súas propias medidas de prevención.

Os estacionamentos públicos da cidade tamén rexistraron unha baixada considerable de ocupación nas súas prazas, tal e como apuntou un responsable dun deles, que estimou, en declaracións a Europa Press, unha baixada de ata o 80% no número de usuarios.

A afluencia aos centros educativos, tanto públicos como concertados, foron mínima e os pais que levaron aos seus fillos trasladáronlles aos profesores que tiveron que recorrer a esta medida ante a falta de tempo para conseguir unha medida de conciliación, que xa deberán de ter solucionada para o vindeiro luns.

SANTIAGO LIMITA TANATORIOS

O Concello de Santiago decretou a suspensión dos mercados de Salgueiriños e Amio, a limitación a 50 persoas como máximo nos tanatorios (incluídos traballadores), o reforzo dos protocolos de hixienización por parte dos servizos de limpeza e a adopción de medidas para mellorar a atención domiciliara a colectivos vulnerables como os maiores e os mozos en idade escolar que teñen bolsa de comedor e que non poden acudir aos centros pola suspensión das clases en Galicia.

Ademais, quedan suspendidas todas as actividades culturais e deportivas na cidade, ademais da escola municipal de música e as escolas infantís dependentes do concello. Así mesmo, as vodas civís programadas quedaron limitadas a un aforamento de 30 persoas debido ás dimensións dos salóns do Pazo de Raxoi, sede do concello da capital de Galicia.

Trátase dun paquete de medidas adoptadas este venres polo goberno compostelán para combater o avance do coronavirus nunha xunta extraordinaria que deu luz verde a dotar á Alcaldía dun mecanismo que a habilita a adoptar gastos especiais ante a crise sanitaria que afecta a todo o planeta pola expansión do COVID-19.

PECHE DE TENDAS

Inditex pechará todas as súas tendas temporalmente, a partir de mañá, na Comunidade de Madrid, A Rioxa e Miranda de Ebro (Burgos) ante a situación xerada polo coronavirus e seguindo as recomendacións sanitarias, segundo informaron a Europa Press en fontes da compañía fundada por Amancio Ortega. Así mesmo, a compañía xa procedeu ao peche dos seus establecementos en Igualada (Barcelona), despois de que a Generalitat ordenase o confinamento de 70.000 persoas en catro municipios de Barcelona, entre eles Igualada.

Tamén Adolfo Domingo pecha desde este venres os seus puntos de venda en Madrid e Burger King España decidiu botar o peche nos seus establecementos propios da cadea en toda a Península.

A REAL FILHARMÓNICA CANCELA CONCERTOS

A Real Filharmonía de Galicia decidiu cancelar todos os seus concertos programados para este mes de marzo. En concreto, explicou a entidade, os concertos afectados pola cancelación son os do día 19 en Santiago, o 20 en Ourense, o 25 en Vigo, o 26 en Santiago e o 27 en Ferrol. O reembolso realizarase de forma automática no caso das entradas compradas online e no propio despacho de billetes se foron mercadas presencialmente no Teatro Princial. 

ESTUDANTES ATRAPADOS

Preto dunha trintena de alumnos do centro A Purísima de Ourense permanecen atrapados en Malta tras a decisión do Goberno de cancelar os voos entre este país e España, debido ás restricións para evitar a propagación do COVID-19.

Os nenos, que teñen entre 6 e 12 anos, atópanse alí xunto a dous profesores e un monitor realizando unha viaxe de estudos para practicar inglés e tiñan que volver este sábado a Galicia. A pesar diso, de momento non teñen unha solución para regresar, despois de que o mércores o Goberno de Malta cancelase todos os voos co país.

Segundo trasladou unha nai dun dos pequenos, en declaracións a Europa Press, as autoridades dixéronlles que se puxesen en contacto coa embaixada, pero a día de hoxe descoñecen como van volver os seus fillos, que "están ben" e "facendo vida normal".

COMERCIO

O comercio é outro dos sectores afectados pola crise sanitaria do coronavirus e as medidas extraordinarias adoptadas polo Executivo galego na pasada xornada tamén lle afectan. Por exemplo, os titulares das superficies comerciais deben responsabilizarse de tomar "as medidas precisas" para "evitar aglomeracións". Así o recolle o acordo publicado a última hora da pasada xornada nunha edición 'bis' do Diario Oficial de Galicia (DOG), que determina a suspensión da actividade de dinamización comercial en espazos pechados.

Tamén se fai constar que en superficies comerciais "reforzaranse as medidas de información, as medidas de hixiene, así como as medidas e intervalos de limpeza nas instalacións". Así mesmo, apúntase que o seu titular "adoptará as medidas precisas para evitar aglomeracións" e "cumprir o réxime de distancias recomendado polas autoridades sanitarias". Finalmente, recóllese que na Escola Galega de Consumo se suspenden as actividades presenciais no recinto e fóra del, e a súa actividade formativa.

O documento publicado ratifica as medidas avanzadas polo presidente da Xunta, Alberto Núñez Feijóo, tanto despois do Consello da Xunta como da reunión da comisión interdepartamental da pasada xornada. Entre as máis significativas está a suspensión das clases en todos os niveis educativos polo menos durante 14 días.

Pero tamén se desaconsellou, por exemplo, o uso do transporte público a todas aquelas persoas "vulnerables a infeccións respiratorias" ou que convivan e compartan espazo con persoas que padezan esta patoloxía, así como aquelas que presenten síntomas respiratorios —en "risco potencial"— e ás mulleres embarazadas. A estes grupos, xunto aos que crean que teñen posibilidades de infección, desaconséllaselles usar todo tipo de transporte público para evitar pór en risco a súa saúde e previr a expansión do COVID-19 entre a poboación galega.

AS MEDIDAS DE CORREOS 

A CIG denunciou este venres a "pasividade" e as "escasas medidas de protección" adoptadas pola dirección de Correos ante a epidemia de Covid-19. "As súas actuacións non van máis aló de instrucións básicas, como recomendar aos seus empregados e empregadas que laven as mans con frecuencia, manter distancias de seguridade e pouco máis", critican.

O sindicato considera que as Xefaturas de Correos "non son conscientes de que están a dirixir a empresa con máis empregados de Galicia, empregados que, por outra banda, percorren diariamente todos os recunchos do país, desde a cidade máis grande ata a aldea máis afastada", apuntou.

SUSPENSIÓN DE XUÍZOS

O Colexio de Avogados da Coruña adoptou pola a suspensión do servizo de préstamo de togas e da atención presencial nas oficinas do edificio dos xulgados e servizo de orientación xurídica (SOJ) desde o luns, día 16. Pola súa banda, o Consello da Avogacía Galega solicitará ao Tribunal Superior de Xustiza de Galicia (TSXG) que acorde ou autorice "a suspensión de todos os xuízos, vistas, comparecencias, declaracións e sinalamentos nos xulgados e tribunais de Galicia, con excepción das causas con presos e asistencia a detidos".

CRUZ VERMELLA REFORZA A ATENCIÓN A PERSOAS VULNERABLES

Cruz Vermella puxo en marcha esta semana unha campaña de seguimento a máis de 25.500 persoas en Galicia, 400.000 en todo o país, que identificou como especialmente vulnerables ante o coronavirus, isto é, persoas maiores, con discapacidade, con enfermidades crónicas e que participan nos seus programas e actividades.

"Cruz Vermella activa e reforza os seus equipos e pon todas as súas capacidades a disposición das autoridades sanitarias e da poboación en xeral", dixo a entidade, que alertou de que "o medo e a desconfianza poden aumentar a propagación das enfermidades e obstaculizar os esforzos por contelas". Unha das medidas "máis importantes" que puxo en marcha Cruz Vermella para apoiar ás persoas máis vulnerables, foi "lanzar unha campaña informativa dirixida a máis de 25.500 persoas usuarias identificadas en Galicia como especialmente vulnerables ante o coronavirus".

PECHE DA CATEDRAL

A Catedral de Santiago decidiu pechar as súas portas aos visitantes a partir das 12,00 do mediodía deste venres, como medida preventiva contra o coronavirus. A Catedral informa de que non recibirá máis visitas "ata novo aviso", pero as obras de restauración que se executen no interior da basílica "continuarán o seu normal desenvolvemento".

Esta medida adóptase sen data límite e "atendendo ás indicacións das autoridades sanitarias" para frear a expansión do Covid-19, xa considerada pandemia.

Isto supón un paso máis aló con respecto ás restricións adoptadas a principios de semana, cando restrinxiu o tradicional abrazo ao Apóstolo Santiago e retirou a auga bendita das pías.

Tamén o Círculo de Empresarios de Galicia, cuxa sede se atopa en Vigo, anunciou o peche das súas instalacións desde este luns como medida preventiva ante a propagación do coronavirus.

EIXO ATLÁNTICO

O Eixo Atlántico suspendeu todos os seus eventos públicos previstos en Galicia e Portugal ata que se supere a crise sanitaria causada polo incremento de casos de coronavirus en España e o país luso.

O organismo detallou que, de modo preventivo, cancelouse a realización dos actos fixados para os próximos meses de abril e maio ante as indicacións da Xunta, o Goberno portugués e colectivos médicos.

Deste xeito, os eventos relacionados coa Capital da Cultura de Braga e a mostra musical de novas intérpretes prevista para abril en Ferrol non levarán a cabo durante o período sinalado.

Neste sentido, o Eixo Atlántico remarcou que a aplicación destas medidas permanecerá vixente "ata que se controlou a pandemia e as administracións públicas recomenden retomar a normalidade".