A terapia con plasma inmune para pacientes con Covid-19 esténdese en Galicia

Tras aplicarse no Hospital Álvaro Cunqueiro de Vigo, realizarase agora no CHUS de Santiago e chegará ao resto de hospitais galegos de referencia. Galicia dispón xa dun cento de unidades dese plasma e traballa na creación dunha reserva.

Por Europa Press / Redacción | Santiago de Compostela | 24/05/2020 | Actualizada ás 13:52

Comparte esta noticia

A terapia con plasma hiperinmune para pacientes con COVID-19, que se iniciou a pasada semana no Hospital Álvaro Cunqueiro de Vigo estendeuse xa ao Complexo Hospitalario Universitario de Santiago (CHUS), onde dous pacientes con coronavirus recibiron senllas unidades de plasma de persoas que estiveron infectadas e recuperáronse, segundo confirmaron fontes de Sanidade.

As mesmas fontes avanzaron que a próxima semana o procedemento chegará ao Complexo Hospitalario Universitario da Coruña e que a previsión é que todos os hospitais galegos de referencia (nas sete principais cidades de Galicia) participen no mesmo, "a condición de que" haxa voluntarios para doar o plasma.

A utilización de plasma de pacientes que superaron enfermidades víricas deu bo resultado en enfermos e, ante a inexistencia de tratamentos eficaces contra a COVID-19, contemplouse esa vía como alternativa terapéutica dentro dun estudo de investigación. De feito, o Comité Científico de Seguridade Transfusional do Ministerio de Sanidade destacou que a OMS ve esta terapia "potencialmente útil e esperanzadora".

Por iso, en Galicia impulsouse o tratamento con plasma de enfermos recuperados, nun proceso coordinado pola Axencia de Doazón de Órganos e Sangue (ADOS) e cos hospitais da rede pública do Sergas, "co obxectivo de xerar unha evidencia científica das potencialidades do tratamento". Para iso, levará a cabo un estudo de investigación, cun "enfoque multidisciplinar" que, ademais contará co apoio do Comité Ético de Investigación Clínica.

En base a ese enfoque, Sanidade pretende que todos os centros da rede do Sergas poidan participar no proceso, definindo os distintos escenarios "nos que a aplicación do plasma pode ser óptima".

ESTUDO CIENTÍFICO

Os equipos implicados desenvolven o estudo científico no que se habilita á ADOS para coordinar e ditar as instrucións e recomendacións, así como para elaborar os protocolos de procedemento para a doazón do plasma.

O estudo ten unha primeira fase de preselección de doantes (por parte dos servizos de Hematoloxía e Hemoterapia dos hospitais), que deben ser persoas que tivesen un diagnóstico de COVID-19 documentado por proba de laboratorio, con bo estado de saúde, asintomáticos e que esperasen polo menos 14 días desde a PCR negativa.

Esas persoas, por tanto, teñen que estar "totalmente recuperadas" e, ademais, asinar un consentimento informado para participar no estudo clínico.

Nunha segunda fase, a Axencia de Doazón de Órganos e Sangue encárgase da extracción do plasma, procesado, criopreservación e posterior distribución das unidades, seguindo uns estritos protocolos marcados por estándares de calidade.

Así, a extracción realízase en locais da ADOS, "con todas as medidas de seguridade e hixiene", mediante o sistema de aférese, que é un proceso de doazón selectiva de compoñentes sanguíneos. As unidades extraídas son tratadas pola Axencia, que se encarga da inactivación das unidades de plasmaférese obtidas con azul de metileno.

Ditas unidades (hai que ter en conta que cada plasmaférese permite a obtención de dúas unidades de plasma hiperinmune) almacénanse a -80 ºC, teñen unha vida útil de ata dous anos e o seu uso será "exclusivo para investigación en enfermos con confirmación de COVID-19".

PRIMEIROS TRATAMENTOS

A finais do pasado mes de abril iniciouse, na área sanitaria de Vigo, o proceso de extracción aos primeiros doantes e a pasada semana informouse do primeiro tratamento en Galicia con esta terapia, a un paciente do Hospital Álvaro Cunqueiro de Vigo: un home de 72 anos, con pneumonía bilateral por COVID-19 e patoloxías crónicas, e no que os tratamentos convencionais non habían resultado eficaces.

Fontes sanitarias confirmaron que, nos últimos días, tamén se tratou coa mesma terapia dous pacientes con coronavirus ingresados no Complexo Hospitalario Universitario de Santiago.

Así mesmo, avanzaron que, a próxima semana, está previsto que o Complexo Hospitalario Universitario da Coruña se incorpore a este procedimeinto e, "no transcurso dos próximos días, se somen os restantes hospitais de referencia das sete grandes cidades galegas", "a condición de que exista un grupo de voluntarios que reúna os requisitos precisos para participar".

DOANTES E RESERVA DE PLASMA

Segundo Sanidade, ata o momento preseleccionouse uns 120 voluntarios, dos que a metade xa fixo a doazón. Así, grazas á "elevada participación e compromiso" destas persoas curadas, xa existen para a súa utilización en hospitais de Galicia un total de 102 unidades terapéuticas de plasma hiperinmune.

Paralelamente á aplicación dos tratamentos, en Galicia a ADOS creará unha reserva dese plasma hiperinmune, cuxas unidades estarán "a disposición de todos os hospitais galegos".

Así mesmo, destacaron fontes sanitarias, a Comisión Europea "promove a posta en funcionamento dun rexistro de doantes de plasma", unha base de datos de doantes e receptores que, en Galicia, "xa se está cumprimentando, baixo a coordinación dos servizos de hemovigilancia".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta