Galicia acollerá o seu primeiro 'hackaton' virtual

Galicia contará entre o 27 e o 30 de xuño co seu primeiro 'hackaton' virtual, unha experiencia inmersiva no que empresas tecnolóxicas, universidades e persoas traballarán para dar solución a diversos retos para adaptar o tecido empresarial á nova realidade.

A través desta experiencia, tentarase desenvolver dun modo áxil todo tipo de prototipos e solucións desde un punto de vista transversal, aberto e de aplicación inmediata no ámbito industrial, comercial e o emprego.

O '#HACKatHOME' pretende involucrar tanto a estudantes como a profesionais da programación, a investigación ou o deseño, co fin de colaborar en grupo para sentar as bases da construción de solucións físicas e dixitais para afrontar os cambios da sociedade.