Madrid ve ben que a Xunta ordene rexistrar aos viaxeiros da súa comunidade
Javier Fernández Lasquetty, conselleiro de Facenda e Función Pública, asegura que lle "parece ben", xa que "non limita o movemento a ninguén".
Por Europa Press / Redacción | MADRID | 06/08/2020 | Actualizada ás 13:33
O conselleiro de Facenda e Función Pública da Comunidade de Madrid, Javier Fernández Lasquetty, asegurou que lle "parece ben" o rexistro de viaxeiros madrileños que impuxo a Xunta de Galicia porque "non limita o movemento de ninguén", algo moi distinto da corentena que impuxeron varios países europeos.
De feito, el mesmo viaxará a Galicia nos próximos días, como indicou na rolda de prensa na que deu conta do balance das operacións de financiamento que levou a cabo a Dirección Xeral de Política Financeira e Tesouraría ao longo deste exercicio.
Lasquetty remarcou as diferenzas entre o sistema da Xunta, a petición de rexistro, daquel que impón unha corentena, establecido por distintos países europeos e con afección para varias rexións españolas.
"A corentena é unha limitación da liberdade, non podes saír dun sitio en catorce días. A petición de rexistro de Galicia parécenos ben para ter información de onde están esas persoas que veñen de Madrid por se necesitan contactar con elas ou chamar para preguntarlles se están ben ou se teñen síntomas. Non limita o movemento de ninguén", declarou.
