O coronavirus volve ás residencias: soben a tres os maiores infectados na Domusvi Matogrande da Coruña
As residencias de maiores galegas non tiñan ningún caso positivo entre os usuarios desde o pasado 30 de xuño.
Por Europa Press / Redacción | A Coruña | 09/08/2020 | Actualizada ás 12:41
O número de maiores infectados co coronavirus na residencia Domusvi Matogrande da Coruña subiu a tres este domingo, dous máis que na xornada de onte, cando constaba un único contaxio neste centro, de acordo cos datos facilitados pola consellería de Sanidade e Política Social.
As residencias de maiores galegas non tiñan ningún caso positivo entre os usuarios desde o pasado 30 de xuño, aínda que si houbo contaxios que afectaron a traballadores. De feito, este domingo mantéñense como activos os casos dunha empregada da Residencia de Maiores de San Bartolomeu, en Xove (Lugo) e o dun traballador da Residencia de Maiores de Paradela, na mesma provincia.
A situación epidemiolóxica na área sanitaria da Coruña-Cee levou a que a Xunta adoptase medidas restritivas, entre as que se atopan a suspensión das visitas e saídas en todas as residencias. Tamén tomaron medidas similares o venres algúns centros deste tipo das áreas de Ourense, Pontevedra e Vigo.
