PSdeG esixirá á Xunta "datos exactos" da pandemia por munipios mediante iniciativas parlamentarias
Esta falta de información, engade o parlamentario socialista Julio Torrado, "deixa de lado a colaboración institucional cos concellos" porque "impide accións coordinadas e complementarias".
Por Europa Press / Redacción | SANTIAGO DE COMPOSTELA | 18/10/2020 | Actualizada ás 19:19
O Grupo Socialista no Parlamento galego rexistrou iniciativas para esixir á Xunta que facilite aos municipios os "datos exactos de contaxiados, casos activos, curados e todos aqueles de que dispoña" para "aumentar a coordinación institucional" na loita contra a pandemia de COVID-19.
O portavoz de Sanidade do PSdeG na Cámara, Julio Torrado, insta á Consellería do ramo a "modificar" o sistema de información ofrecido aos concellos, xa que a Federación Galega de Municipios e Provincias (Fegamp), liderada polo alcalde de Vilagarcía, o socialista Alberto Varela, xa solicitou "maior información para poder servir de axuda e colaboración".
Ao fío diso, o deputado lamenta que, a pesar de que a Xunta modificou a súa postura e ofrece agora un mapa diario coa incidencia do coronavirus por municipios, a información non é "concreta", senón que simplemente indica a "gravidade" da pandemia en cada localidade pero "non esclarece tendencias nin posición concreta".
Esta falta de información, engade Torrado, "deixa de lado a colaboración institucional cos concellos" porque "impide accións coordinadas e complementarias".
O Grupo Socialista, a través dunha proposición non de lei e unha interpelación, denunciará no pleno desta semana que a transparencia e a achega de información sobre a COVID-19 sexa "un dos elementos que está a xerar maior confusión e disparidade de accións" por parte da Xunta.
Ademais, aseguran que a falta de "datos abertos" non permite que investigadores, medios de comunicación e axentes sociais, económicos e políticos poidan facer "análise propios e contribuír con conclusións".
LIMPEZA DE COLEXIOS
Por outra banda, o PSdeG rexistrou na Cámara unha moción para reclamarlle ao Goberno galego que garanta aos concellos o financiamento da limpeza e desinfección dos centros educativos.
O deputado Luís Álvarez, quen defenderá a iniciativa no pleno, lamenta que a Consellería de Educación derive nos municipios esta obrigación "sen ofrecer" os fondos necesarios, polo que solicitará que faga as modificacións orzamentarias necesarias neste sentido.
