PP impón a súa maioría para rexeitar novos protocolos educativos e que Xunta asuma custos de limpeza
Os populares aseguran que si "dialogan" coa comunidade educativa "a diferenza" do que fai o Executivo estatal coa 'Lei Celaá'.
Por Europa Press / Redacción | SANTIAGO DE COMPOSTELA | 20/10/2020 | Actualizada ás 20:16
O PPdeG rexeitou senllas iniciativas do BNG e do PSdeG que instaban á Consellería de Educación a acordar coa comunidade educativa os protocolos anticovid nos centros e a asumir o custo das tarefas de desinfección e limpeza dos colexios infantís que sufragan os concellos.
En concreto, o pleno da Cámara galega acolleu este martes o debate acumulado de dúas mocións presentadas por ambas as formacións, textos que non saíron adiante ao ser votados en contra polo grupo maioritario, que defendeu a actuación levada a cabo pola Xunta de Galicia para facer fronte ao comezo do curso escolar.
En primeiro lugar, o deputado nacionalista Manuel Lourenzo lamentou que ao Partido Popular "déanlle igual" as propostas para mellorar a situación dos centros aínda que aborden "problemas obxectivos" e rexeite "sistematicamente" as demandas da comunidade educativa.
Pola súa banda, o socialista Luís Álvarez trasladoulle ao PP que Educación contaría co apoio do PSdeG "sempre que os protocolos da Xunta sexan froito dun consenso" que non se deu nas actuais circunstancias. Ademais, instou ao Executivo autonómico a facer as modificacións orzamentarias necesarias para transferir aos concellos galegos as cantidades necesarias para que poidan asumir as obrigacións derivadas das novas tarefas de limpeza.
TRABALLAR "CONXUNTAMENTE"
En fronte, o portavoz de Educación do Grupo Popular, Ovidio Rodeiro, avanzou o rexeitamento do seu grupo a estas peticións e avogou por que a Xunta "continúe traballando conxuntamente coa comunidade educativa para garantir a máxima seguridade sanitaria, por asegurar o dereito á educación e por manter a calidade da educación".
Ademais, sostivo que, a diferenza do que fai o Executivo estatal, a Xunta si dialoga coa comunidade educativa e, en referencia á limpeza dos centros, manifestou que o Goberno galego "mantén un exquisito respecto á autonomía municipal, cumprindo fielmente e coa máxima lealdade os compromisos e acordos coa Fegamp a través do pacto local".
