Pontevedra incorporará todos os seus remanentes ao orzamento de 2021: "Imos romper a hucha"

O Concello de Pontevedra incorporará todos os seus remanentes ao orzamento de 2021 para "reactivar a economía", de modo que a partida de investimentos se achegará aos 20 millóns de euros e será o orzamento "máis alto da historia" do municipio.

O concelleiro de Economía e Facenda, Raimundo González, avanzou este mércores en rolda de prensa que o goberno local de BNG e PSOE está a traballar na elaboración dun orzamento que superará os 100 millóns de euros o ano que vén.

"O que pretendemos é poñer todos os recursos e todos os instrumentos que teñamos á nosa disposición", remarcou, antes de engadir que o obxectivo é "recuperar a situación económica de Pontevedra e que volva estar en grella de saída e que teña os mellores resultados posibles".

A confección do documento orzamentario parte da aprobación por parte do Congreso dos Deputados, da suspensión dos tres principios fiscais da coñecida como 'Lei Montoro'. O concelleiro avanzou que para o ano 2021 "non vai haber molestias á débeda, nin ao teito de gasto nin á estabilidade orzamentaria".

DÚAS FASES

Segundo o edil nacionalista, "o marco no que nos movemos para este orzamento é diferente a exercicios anteriores". De modo que, con este punto de partida, o Concello está a elaborar un orzamento para 2021 en dúas fases: unha ordinaria que sería o equivalente a un orzamento normal e unha segunda fase, que se poría en marcha unha vez aprobada a liquidación do Orzamento de 2020, que incluirá "un paquete medidas potentísimo".

"Imos romper a hucha", afirmou Raimundo González, antes de engadir que "todo o remanente que teñamos se vai destinar a investimento ou a axudas económicas aos sectores afectados", xa que o Goberno Local está convencido de que "nesta situación económica tan dura e crúa, pensamos que era o momento de mobilizar todos os recursos".

Edificio Michilena, sede do servizo de persoal do Concello de Pontevedra