Os novos directores xerais da Consellería de Economía fixarán obxectivos en transición ecolóxica e modernización

O vicepresidente económico e conselleiro de Economía, Francisco Conde, sinalou este martes a transición ecolóxica e a modernización do comercio de proximidade galego, avanzando na dixitalización e a internacionalización, como retos para os novos directores xerales que tomaron posesión, Paula Uría, de Planificación Enerxética e Recursos Naturais, e Manuel Heredia, de Comercio e Consumo.

Durante a toma de posesión, Conde agradeceu e recoñeceu o traballo e os anos de servizo público de Ángel Bernardo Tahoces e Sol Vázquez, os encargados ata agora destes departamentos, e sinalou que se trata de áreas "estratéxicas e prioritarias" nas políticas de reactivación económica.

Paula Uría Traba é enxeñeira industrial na especialidade enerxética pola Escola Politécnica Superior de Ferrol e Máster en xestión de enerxías renovables pola Universidade de Cádiz. Funcionaria no corpo facultativo superior da Xunta de Galicia, subgrupo A1, na escala de enxeñeiros industriais, a súa traxectoria profesional está ligada á Administración autonómica, na que desempeñou diversos cargos tanto no Inega como na anterior Dirección Xeral de Enerxía e Minas da que era, desde 2015, subdirectora xeral de Enerxía.

Manuel Heredia Pérez está vinculado ao sector do comercio desde hai máis de vinte anos, tanto en establecementos comerciantes polo miúdo na cidade da Coruña como no sector téxtil, no ámbito do deseño e no departamento de compras de empresas como Pull and Bear, PVH Arrow e Zara, con responsabilidades nos mercados nacionais e internacionais. Desde hai un ano, Heredia Pérez traballaba para a compañía Guess Europe en Suíza, como responsable de produción de peza exterior e denim para o mercado europeo.

O vicepresidente económico, Francisco Conde. ANA VARELA