Por E.P. | Santiago de Compostela | 27/11/2020 | Actualizada ás 14:10
A portavoz nacional do BNG, Ana Pontón, afirmou este venres que Madrid "se converteu nunha especie de paraíso fiscal", mentres Galicia leva anos cun sistema de financiamento autonómico "caducado e discriminatorio".
Pontón expuxo o seu punto de vista sobre o debate acerca da armonización fiscal en España, durante o acto de presentación dunha campaña do BNG en apoio do comercio local en Santiago de Compostela, onde sinalou que "é evidente que Madrid leva moitos anos dopada polo efecto de capitalidade" e "converteuse nunha especie de paraíso fiscal".
Fronte a iso, subliñou, Galicia "leva seis anos cun sistema de financiamento caducado e discriminatorio", que lle impide dotarse dos recursos para afrontar as súas necesidades. De feito, incidiu, este ano Galicia vai recibir "menos recursos" por financiamento autonómico.
"Hai que cambiar este marco que discrimina a Galicia, e ter capacidade para facer unha fiscalidade xusta, capacidade plena para recadar impostos e con iso fortalecer a Sanidade, a Educación, e ter investimentos para a reactivación económica tan necesaria", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.