SOS desde o Hospital da Coruña pola covid: "Cústanos manter cirurxías urxentes"

O xefe do Servizo de Cirurxía Xeral do Complexo Hospitalario Universitario da Coruña (Chuac), José Noguera, lanzou á cidadanía unha petición de "auxilio" ao pedir a súa axuda para "controlar" o coronavirus facendo "caso" ás solicitudes de autoconfinamiento e ás restricións marcadas polas autoridades sanitarias.

"A día de hoxe estanos custando manter as cirurxías urxentes e oncolóxicas", sinala nun audio remitido aos medios de comunicación no que afirma tamén que xa non poden atender "as intervencións ordinarias". "Pola cantidade de recursos humanos e materiais que temos que destinar no hospital para a atención por Covid", incide este profesional.

"Necesitamos os nosos quirófanos, camas de reanimación, anestesistas, enfermeiras, cirurxiáns e necesitámolo para atenderte", asevera na súa petición de colaboración por parte da cidadanía. "É pola túa saúde, pola dos teus familiares, pola saúde de todos", conclúe.

Cirurxía cerebral nun quirófano