A Atención Primaria, "ao bordo do abismo": "Faltan médicos, enfermeiros e ata persoal de limpeza"
CESM urxe máis persoal tras un ano de pandemia onde a "sobrecarga de traballo non fixo máis que aumentar".
- Os médicos alertan: a inmunidade de grupo podería non chegar ata verán do ano que vén
- Satse pide que se reforce a Enfermaría en Atención Primaria pola "sobrecarga" coa vacinación
- Críticas ó Sergas por "aparcar" unha promesa ós sanitarios 7 días despois de comprometerse a ela
Por Europa Press / Redacción | SANTIAGO DE COMPOSTELA | 09/04/2021 | Actualizada ás 11:35
A Delegación da Confederación Estatal de Sindicatos Médicos en Galicia (CESM) advirte de que a Atención Primaria "está ao bordo do abismo" tras un ano de pandemia pola Covid-19, á vez que urxe máis persoal. A través dun comunicado de prensa, este sindicato asegura que a Atención Primaria "está ao bordo do abismo no medio dun auténtico caos onde faltan médicos de familia, enfermeiras e ata persoal de limpeza", despois de que transcorrese un ano desde a irrupción da pandemia.
CESM asegura que a "sobrecarga de traballo non fai máis que aumentar desde marzo de 2020 coa chegada do virus SARS-CoV-2", porque ás consultas telefónicas "hai que sumar as que se converten en presenciais, as urxencias que se presentan e o seguimento dos enfermos por Covid-19", indica, "ademais de limpar o aparataxe e equipos que se utilicen entre consulta e consulta, chegando a xerarse axendas de ata 75 pacientes diarios para un só facultativo".
Esta situación para CESM "está a provocar unha tensión brutal" entre os profesionais que, abunda, "en moitos casos desemboca en baixas prolongadas, ás que hai que sumar os propios médicos que enferman de Covid-19 ou outras doenzas, quedando os centros de saúde moitas veces coa metade do persoal asignado".
Por iso, este sindicato médico considera que "a situación é moi grave" xa que, ao actual déficit de persoal, que se estima nun 20%, "hai que engadirlle o feito de que nestas circunstancias moitos profesionais que pensaban prolongar a súa vida laboral optan polo retiro", e, avisa CESM, "a previsión de xubilación de máis do 50% na próxima década, o que impedirá que se produza unha substitución xeracional".
"Se ademais temos en conta o reducido número de prazas que se convocan nas OPEs para esta especialidade e a falta de atractivo que ten un traballo excesivo sen o merecido recoñecemento parte da administración, o resultado non é outro que o dunha Atención Primaria totalmente desprestixiada", sentenza.
"MODELO MÁIS RESOLUTIVO"
CESM Galicia reitera a necesidade de contar cun "orzamento finalista para Atención Primaria" e coa implantación dun "modelo máis resolutivo, que axilice as probas diagnósticas e os tratamentos dos pacientes cando non sexa necesario derivalos a outra especialidade", de maneira que, matiza, "se evite o tapón e a demora na solución". Con motivo da celebración do Día da Atención Primaria o próximo 12 de abril CESM fai un chamamento, tanto ás autoridades sanitarias como á cidadanía, para volver "ter unha Atención Primaria de calidade, prestixiada e dotada cos recursos necesarios para poder prestar a atención que os cidadáns merecen".
