A Covid dálle un duro golpe aos medios tradicionais: La Voz e Faro perden 200.000 lectores

A Covid provocou un terremoto de dimensións aínda impredecibles nas versións en papel dos grandes medios tradicionais galegos. Un broucazo de película do que van tardar en recuperarse... se é que se recuperan. A caída dos lectores dos xornais tradicionais en papel foi o pasado ano dun 25%, con descensos aínda maiores en xornais como La Voz de Galicia ou Faro de Vigo que, xuntos, perden máis de 200.000 lectores.

 

Segundo os datos do Estudio General de Medios aos que tivo acceso Galicia Confidencial, o descenso foi xeralizado en todos os medios tradicionais, incluídas as súas versións online (-4,3%), cuxo consumo nos últimos anos foi sempre á alza. Unha caída na Internet que contrasta coa suba experimentada por medios como o Galicia Confidencial que en 2020 bateu todos os seus récords de visitas, chegando a superar nun só día os 200.000 visitantes únicos, e afianzando a súa segunda posición como medio galego na rede só por detrás de La Voz. Precisamente, este ano, GC era o primeiro xornal online galego en abrir conta na rede Tik Tok.

 

GRAN CAÍDA DE LA VOZ E FARO

 

O descenso de lectores de prensa foi común a todos os soportes. As cabeceiras líderes, La Voz de Galicia e Faro de Vigo perderon 131.000 e 74.000 lectores, respectivamente, sendo as que máis sentiron o golpe da covid que provocou unha caída de vendas xeralizadas en marzo do pasado ano que non se recuperou ata ben entrado o verán.

 

Deste xeito, la Voz de Galicia caeu o pasado ano un 14%, caendo até os 356.000 lectores.  Faro de Vigo deixouse un 26% de lectores e quedou en 119.000. Tras eles e xa a unha gran distancia quedan xornais como El Progreso e La Región que tamén baixan, aínda que menos, e quedan nos 50.000 lectores.  Pero, os que máis sofren o impacto da Covid son os xornais máis pequenos. Diario de Arousa perdeu o 50% dos lectores, Atlántico Diario o 42% e La Opinión de A Coruña o 36%. 

 

A caída non cambiou o dominio que certos medios teñen das provincias galegas. Deste xeito, La Voz segue sendo o xornal máis lido na Coruña e o Faro de Vigo, na de Pontevedra, mentres que La Región e El Progreso, lideran o ranquing en Ourense e Lugo, respectivamente. 

 

OUTROS SOPORTES

 

O EGM destaca que, en Galicia, a Televisión foi o medio que tivo unha caída menos acusada (-1,5%), e continúa como medio líder en Galicia. A radio tamén cae, un -5,2% e as revistas un 20,8%, pero menos que o 25,1% dos xornais. Ambos soportes presentan as perdas de audiencias máis acusadas.

 

Entre as versións online dos medios de comunicación, os diarios online continúan sendo os máis consumidos, aínda que destaca o crecemento da TV online (+31,7%) e Radio online

(+16,7%).