Galicia rexistra 136 doantes de órganos en 2020 e 271 persoas en lista de espera no peche do ano
Deses 136 doantes, 17 foron doantes en vivo.
Por E.P. | SANTIAGO DE COMPOSTELA | 02/06/2021 | Actualizada ás 18:46
Un total de 136 persoas foron doantes de órganos ao longo do ano 2020 en Galicia, posibilitouno a realización de 328 transplantes.
Mentres, no peche de 2020 había na comunidade galega 271 persoas en lista de espera para recibir un órgano, dos que "69 eran de corazón, pulmón, fígado e páncreas", segundo datos achegados polo presidente de Alcer (Asociación para a loita contra as enfermidades do ril) na Coruña, Rafael Rodríguez.
Estas declaracións realizounas Rodríguez en Ferrol, na mañá deste mércores, no Hospital Juan Cardona, onde compareceu acompañado por varios responsables da dirección deste centro e do equipo médico con ocasión da celebración este 2 de xuño do Día do doante de órganos.
Así, chamou a atención sobre as persoas que están á espera dun órgano e que "se non son trasplantados nun prazo dun ano, pois morrerán".
Explica que o número de donadores "pode parecer que é baixo", "pero é moi difícil atopar un doante de órganos, xa que só una de cada cen persoas que falece nun hospital pode ser doante".
DOANTES EN VIVO
Alcer tamén destacou que, dos 136 doantes que houbo nos doce meses do ano 2020, 17 foron doantes en vivo, "é dicir, un pai, unha nai, un irmán ou unha parella que lle dá un ril ou unha porción de fígado a esa persoa que o necesita".
Pola súa banda, o xerente do Hospital Juan Cardona, Francisco Soriano, manifestou que "hoxe é un día, sobre todo, de agradecemento a esas persoas que de maneira altruísta e solidaria doan os seus órganos para que outras persoas poidan seguir vivindo". "Non hai maior acto de solidariedade", opina.
Igualmente, agradeceu o traballo dos profesionais sanitarios, "xa que co seu traballo realízanse os transplantes para salvar vidas", ademais de remarcar o labor realizado por Alcer, "non só cos enfermos renais, senón que tamén cos seus familiares".
O xefe do servizo de Nefrología do hospital privado situado no barrio de Caranza, Cristóbal Donapetry, quixo "animar a toda a poboación para que se faga doante de órganos, xa que salva vidas".
No caso concreto deste centro hai "ata 17 pacientes que están a esperar por un ril". "Tanto en Galicia como no resto de España temos a taxa de doantes máis alta do mundo, o cal quere dicir que os españois en xeral e os galegos en particular somos xente moi altruísta neste sentido", valora.
