Galicia avanza no deseño de arrecifes artificiais para a protección de ecosistemas mariños

O Centro de Investigacións Tecnolóxicas do Campus Industrial de Ferrol avanza no deseño do módulo de arrecife artificial adaptado á xeomorfoloxía dos fondos mariños galegos, un proxecto desenvolvido por 13 investigadores da Universidade da Coruña, coordinados por Luís Carral, e no que a Xunta investiu 100.000 euros a través dun convenio de colaboración asinado o ano pasado.

As conselleiras de Mar, Rosa Quintana, e Medio Ambiente, Ángeles Vázquez, realizaron unha visita este martes a este centro ferrolán, onde animaron a profundar na senda da colaboración entre Administración autonómica e institución universitaria a través de proxectos que redundarán "en beneficio da mellora do medio ambiente mariño".

Así, a titular da Consellería do Mar expresou a súa satisfacción por "ver como, desde diferentes ámbitos do coñecemento, os técnicos foron capaces de traballar en conxunto para desenvolver en Galicia o mellor arrecife artificial co obxectivo de recuperar os ecosistemas mariños".

Para Quintana, a importancia deste proxecto é "fundamental" polo papel que cumpren os arrecifes "na protección e o crecemento das especies, ao funcionar como refuxio dos recursos mariños".

Pola súa banda, a conselleira de Medio Ambiente incidiu en que a Xunta "avanza" para "cambiar o modelo produtivo lineal, baseado en usar e tirar, por un circular no que se prime a reutilización, a reciclaxe e a recuperación".

Vázquez considera este proxecto da Universidade da Coruña un "exemplo" desa economía circular, por apostar por "un deseño ecolóxico para reducir os posibles impactos da fase produtiva" e pola "reutilización de materiais inertes relacionados co mundo mariño, pasando de ser un residuo a ter unha segunda vida como materia prima sustentable", como é o caso dos restos do procesado da industria conserveira.