O PPdeG aproba en solitario o ditame da comisión de reactivación da Covid

O pleno do Parlamento galego deu luz verde ao ditame final da comisión de reactivación só cos votos a favor do PP, mentres a oposición rexeitou o texto por ser "de parte" e optar polo "continuísmo con vellas receitas fracasadas".

No debate, o portavoz parlamentario do PPdeG, Pedro Puy, defendeu un texto con 500 medidas para a recuperación fronte ao impacto da pandemia, no que se inclúen medio centenar de transaccións coa oposición, tras un "longo" traballo cunhas 50 comparecencias e máis de 150 informes.

E é que Puy valora que este ditame servirá para a "Galicia de futuro, a recuperación da pandemia e crear emprego de calidade para os mozos".

En fronte, a portavoz nacional do BNG, Ana Pontón, censurou que "o desenlace" desta comisión "estaba escrito antes", pois o PP limitouse a un "paripé" de negociación para dar lugar a un texto "de parte", "autocomplaciente" e "cheo de vaguedades" que "non ofrece resposta á altura do momento".

Nesta liña, o líder os socialistas galegos, Gonzalo Caballero, cargou contra un ditame "insuficiente" con "falta de concreción" e que "escapa de asuntos fundamentais". Por iso, deixa claro que o PSdeG "non pode ser cómplice dunhas políticas conservadoras que dan as costas a Galicia".

Entre outras cuestións, este ditame inclúe un anexo con 115 millóns de euros que agora se desbloquearán para posta a disposición da recuperación. O 24% deste fondo de dirixirá ás administracións locais.

Ademais, abordan reformas como un novo modelo de residencias, a ampliación do Servizo de Axuda no Fogar (SAF) e a dixitalización da educación, unido ao apoio ao sector cultural e a plena igualdade de sexos.