A cardióloga Marisa Crespo, filla predilecta de San Cristovo de Cea
Destacan a súa traxectoria "de indudidable proxección mundial".
Por E.P. | SANTIAGO DE COMPOSTELA | 11/09/2021 | Actualizada ás 20:06
A cardióloga Marisa Crespo foi nomeada filla predilecta de San Cristovo de Cea, en Ourense, "todo un referente internacional no ámbito da insuficiencia cardíaca e do transplante de corazón", segundo sinalou a Deputación nun comunicado.
A cardióloga recibiu esta mañá no Convento de Santa María A Real de Oseira o título de Filla Predilecta do Concello, "un máis que merecido recoñecemento a unha traxectoria profesional de indubidable proxección mundial, pero tamén a unha muller que destaca polos seus valores persoais e á súa calidade humana", tal e como asegurou o presidente do organismo provincial, Manuel Baltar.
Ao acto tamén asistiron o alcalde de Cea, José Luís Valladores, e outros membros da corporación, así como o presidente do Parlamento de Galicia, Miguel Santalices, e o delegado territorial da Xunta en Ourense, Gabriel Alén.
O presidente provincial felicitou ao Concello e aos veciños de San Cristovo "por unha homenaxe que contribúe a visibilizar a enorme riqueza humana e profesional de mulleres que, ben por nacemento ou por ascendencia, levan o nome de Ourense e dos seus distintos territorios polo mundo".
Marisa Crespo Leire lidera a Unidade de Insuficiencia Cardíaca e Transplante de Corazón no servizo de cardiología do Complexo Hospitalario Universitario da Coruña (CHUAC). Ademais, é profesora titular de Medicina na Universidade da Coruña e forma parte do Comité de Educación da Sociedade Europea de Cardiología. Crespo foi elixida pola revista científica 'Circulation' como unha das mulleres líderes no mundo do transplante cardíaco e en 2020 recibiu a medalla de Ouro e Brillantes do Colexio oficial de Médicos da Coruña.
