O IX Congreso Internacional do Ano Santo aborda a peregrinación como vía de esperanza
Desde este xoves terán lugar unha serie de relatorios na capital galega.
Por E.P. | SANTIAGO DE COMPOSTELA | 23/09/2021 | Actualizada ás 15:17
O IX Congreso Internacional do Ano Santo Compostelán celébrase desde este xoves na capital galega, a través dunha serie de relatorios nos que se abordará a idea da peregrinación xacobea e do Camiño de Santiago como un itinerario de esperanza neste contexto de dificultade marcado pola pandemia sanitaria e as súas consecuencias en diferentes ámbitos.
Tras enfocar as últimas edicións na preparación do Ano Santo, esta nova edición centrarase no sentimento de esperanza e recuperación que implica a ruta nestes tempos de pandemia, tema que se abordará desde diferentes puntos a través de relatorios e mesas redondas con representantes como Bernart Baltza ou José Fernández Danvila.
O acto de inauguración celebrouse na propia Cripta do Pórtico da Gloria da Catedral compostelá, coa presenza do arcebispo, Julián Barrio, o edil Sindo Guinarte, a directora de Turismo de Galicia, Nava Castro e o delegado de Peregrinacións da Catedral de Santiago, Segundo Pérez.
A directora de Turismo de Galicia, Nava Castro, incidiu na necesidade de traballar "para recuperar a esperanza" tras os meses máis duros da pandemia e "afrontar os retos" do Camiño de Santiago "desde os valores cristiáns". Así, destacou o voluntariado como "parte fundamental" da acollida e "os valores espirituais do Camiño", cuxa "esencia" se sitúa no que o traballo de acollida, a hospitalidade e "a empatía" como "o mellor servizo ao peregrino.
Castro reivindicou a importancia destes tempos tan difíciles para "lembrar a importancia da atención espiritual" e reivindicar a fe e os valores ao longo do Camiño neste Xacobeo.
SENTIMENTO DE ACOLLIDA
Precisamente, Segundo Pérez situou a acollida como unha oportunidade para "abrir portas tanto polo que recibe como polo que é recibido". "Peregrinar non é só camiñar polos carreiros e rutas xacobeas, senón polas vías do espírito", insistiu, e manifesta unha realidade "máis ampla e profunda que desde a mirada superficial" para miles de peregrinos que senten unha "conexión coa súa interioridade" para "descubrirse a si mesmos".
Finalmente, Julián Barrio apelou á "esperanza de peregrinar a Santiago" desde "a verdade auténtica do home". "Chegando a Santiago atópase co cimento do testemuño apostólico", sinalou, posto que o final "é a casa do señor Santiago, pero a meta é a liberdade do corazón".
