Por Europa Press / Redacción | A CORUÑA | 30/09/2021 | Actualizada ás 12:25
A subdelegada do Goberno na Coruña, María Rivas, reivindicou o traballo da Policía Nacional no caso Samuel, do que destacou que deu "os seus froitos" coa detención doutra persoa co que se elevan a sete os arrestados. Mentres, instou a esperar a que conclúa a instrución.
A preguntas dos xornalistas, coincidindo coa súa presenza nun acto no Banco de Alimentos, remitiuse ás palabras do delegado do Goberno en Galicia, José Miñones, que confirmou que o detido o martes, e xa en prisión, é un amigo dos anteriores arrestados. Tamén lembrou que a Policía xa puxo a disposición do xuíz toda a información relativa á investigación.
"Agora queda que finalice a instrución do caso", remarcou a subdelegada do Goberno, que agradeceu á Policía Nacional "a profesionalidade coa que levou a cabo esta investigación" de face a ter os "resultados necesarios".
"Iso non o podo dicir porque depende moito da Policía Nacional e do traballo que están a realizar, pero en principio evidentemente deu os seus froitos e aí temos a detención", respondeu ao ser preguntada pola posibilidade de novos detidos.
Sobre esta última detención e o seu grao de implicación, dixo que iso o deberá determinar a instrución e o xuíz. "A Policía considerou no marco da investigación que esta persoa debía ter algunha relación co sucedido e procedeuse á súa detención e posta a disposición xudicial", recalcou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.