Unha recollida masiva de alimentos para axudar ás mascotas sen fogar

As compañías galegas seguen implicadas coa alimentación e saúde dos animais sen fogar. Desta vez é a cadea de supermercados Gadis a que vén de lanzar unha campaña de recollida de alimentos para dotar a máis de 60 protectoras de animais dos víveres precisos para sacar adiante a esas mascotas abandonadas das que coidan.

A iniciativa estenderase dende o venres 1 de outubro e ata o día 10. Nesa marxe detempo, os clientes de 195  Gadis de Galicia e Castela e León terán á súa disposición un espazo no que poderán depositar artigos para cans e gatos. Como novidade este ano, se o prefiren, teñen a opción de realizar unha contribución económica ao pasar por caixa. A compañía apunta que sumará a súa propia achega do 20% do total dos produtos reunidos, ao igual que en edicións anteriores.

A campaña “Alimenta a amizade” desenvólvese así por terceiro ano consecutivo ante a alta participación dos clientes en anos pasados, nos que mostraron unha “gran solidariedade”. A compañía apunta que tamén foi un factor determinante para dar continuidade a esta acción a petición de axuda realizada por parte das entidades, que en 2021 crecen en número ata superar as sesenta.

“Todo o que se recade irá destinado a cubrir as necesidades de alimentación e hixiene de animais abandonados. Só en Galicia contabilizáronse máis de 25.000 [abandonos] en 2020. Nas dúas campañas previas, en total entregáronse preto de 120.000 quilogramos de artigos de diversa índole”, explican.