Por E.P. | SANTIAGO DE COMPOSTELA | 06/10/2021 | Actualizada ás 19:01
Endesa adquiriu de novo carbón para poder utilizalo na central térmica qua a compañía ten na localidade das Pontes de García Rodríguez para facer fronte a posibles necesidades enerxéticas invernais.
Así o confirmaron fontes sindicais consultadas por Europa Press, que precisaron que dita adquisición pechouse o pasado 30 de setembro e que o mineral ten previsto chegar ao porto exterior de Ferrol, onde a empresa ten unha terminal de descarga, no mes de novembro, para posteriormente ser transportado por estrada ata as instalacións próximas á central térmica.
A filial de Enel, que non confirmou oficialmente esta compra, limitouse a indicar que "está a analizar diversas opcións para atender os requirimentos do operador do sistema en caso dun inverno extremadamente cru ou de alteracións no mercado internacional do gas".
Os sindicatos consultados por Europa Press detallaron que con esta nova compra de carbón, de polo menos 60.000 toneladas, ábrese tamén un novo escenario neste complexo industrial, xa que "nos interesa que se nos concrete en que se vai a traducir, en canto a carga laboral, esta medida", indicaron.
A central das Pontes segue operativa e a disposición do Ministerio de Transición Ecolóxica e do operador do sistema (Rede Eléctrica) en tanto a compañía non reciba a confirmación administrativa do seu peche, algo que non prevé ata finais deste ano ou principios do próximo. Esta central tivo que queimar carbón o pasado mes de xaneiro para atender as necesidades enerxéticas provocadas no país pola treboada 'Filomena'.
Dáse a circunstancia de que o Goberno e as empresas puxeron data de caducidade a esta tecnoloxía en España por tratarse dun combustible fósil que emite CO2 á atmosfera e a intención do Executivo, co seu Plan de Enerxía e Clima, é substituíla por outras fontes de xeración non emisoras. Paradoxalmente, a crise motivada polos altos prezos do gas pode levar a que o Goberno aproveite a súa capacidade ata a data do seu peche.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.