O goberno local da Coruña espera presentar en decembro a demanda para recuperar a Casa Cornide
A declaración como BIC, indica o concelleiro Juan Ignacio Borrego, permitiría abrir as portas do edificio ás visitas independentemente da reclamación sobre a titularidade, como ocorreu co Pazo de Meirás, lembra.
Por E.P. | A CORUÑA | 17/11/2021 | Actualizada ás 17:28
O goberno local da Coruña está a ultimar os informes xurídicos para presentar a demanda xudicial para reclamar a titularidade pública da Casa Cornide, actualmente en propiedade da familia Franco.
Así o informa tras a reunión do Consello Municipal da Memoria Democrática. Segundo explica, o obxectivo é presentar a demanda antes do 31 de decembro deste ano. Ademais, pide á Xunta celeridade no trámite impulsado para declaralo Ben de Interese Cultural (BIC), que "serviría tamén para reforzar xuridicamente o proceso".
A declaración como BIC, indica o concelleiro Juan Ignacio Borrego, permitiría abrir as portas do edificio ás visitas independentemente da reclamación sobre a titularidade, como ocorreu co Pazo de Meirás, lembra.
No encontro, deuse conta tamén dos informes sobre propostas de modificación do rueiro para a retirada de nomes franquistas do espazo público.
Borrego indicou que o concello cumprirá "escrupulosamente" a Lei de Memoria Histórica e que encargará un informe xurídico para garantir que todas as propostas que se debatan cumpran coa devandita lei.
