Baltar erixe a Mobile Week Ourense no "paso definitivo" para converter a provincia en "escaparate de innovación"

O presidente da Deputación de Ourense, Manuel Baltar, erixiu a Mobile Week Ourense no "paso definitivo" para converter a provincia en "escaparate da innovación, o futuro, a vangarda e a prestación dos mellores servizos públicos á cidadanía". Así o destacou durante a inauguración da primeira das tres edicións deste evento que se celebrarán na cidade das Burgas mediante unha alianza entre a Deputación, a Fundación Mobile World Capital Barcelona e a Rede Mundo Atlántico.

"Temos todas as pezas dun gran quebracabezas que o goberno provincial está a unir para visibilizar o territorio", destacou Manuel Baltar en referencia non só a este evento que, "supón unha sacudida tecnolóxica para a provincia", senón tamén en vista á chegada da alta velocidade no mes de decembro. "Ourense converterase nun aeroporto terrestre con extraordinaria capacidade de conectarse con calquera capital do mundo vía Madrid", dixo.

Unha mellora de comunicacións que celebrou ao soster que dará "maior competitividade" e logrará que se cumpra un obxectivo que "viña solicitando desde hai tempo". Ademais, tamén se referiu como pezas deste "gran quebracabezas" ao Parque Tecnolóxico de Galicia e ao centro de I+D+i, ao soster que é "o máis importante de Galicia".