Por Europa Press / Redacción | SANTIAGO DE COMPOSTELA | 01/12/2021 | Actualizada ás 17:46
Un bo número de relatores destacaron as potencialidades que pode achegar a industria galega o sector eólico mariño, no que a unión temporal de empresas (UTE) Navantia-Windar é xa toda unha referencia a nivel mundial.
Así quedou de manifesto durante a celebración do V Congreso Galician Offshore International Hub (GOinterHUB), que se celebrou este mércores nas instalacións do CIS de Ferrol, e de cuxa organización se encargou a Asociación de Industrias do Metal e Tecnoloxías Asociadas de Galicia (ASIME), Navantia, Windar e a Xunta.
Polo escenario das instalacións situadas na Cabana pasaron máis de vinte relatores en conferencias e mesas redondas, onde se falou do futuro do sector eólico mariño, coa presenza duns 300 participantes, tanto de forma presencial como de maneira "en liña".
O encargado de pechar este congreso foi o vicepresidente segundo, Francisco Conde, que detallou que "Galicia conta con capacidades, cun alto potencial desde o punto de vista enerxético, pero tamén cunhas capacidades no ámbito do tecido industrial, en toda a cadea de valor, na que xa depositaron a súa confianza empresas nacionais do sector.
Así se referiu en alusión a Iberdrola e a súa aposta pola UTE Navantia-Windar para a fabricación de estruturas. "Tendo esta capacidade, temos un papel determinante no desenvolvemento desta tecnoloxía", sinalou.
Ademais, Conde aproveitou a súa presenza neste foro para instar o Goberno central a que se una ao Pacto de Estado por Ferrol, "para desta maneira impulsar nesta comarca un Hub de eólica mariña", unha das medidas que recolle o documento elaborado pola Xunta, trasladado ao Executivo de Pedro Sánchez e que desde Madrid non tivo resposta.
Pola súa banda, o alcalde de Ferrol, Ángel Mato (PSOE), que participou na apertura deste Congreso, reclamou que "se autorice a instalación dalgún parque eólico mariño" no territorio e na propia comarca, para o que pediu a todas as administracións que "eliminen as trabas que a día de hoxe existen".
O seu homólogo en Fene, Juventino Trigo (BNG), destacou "a importancia deste sector da eólica mariña", aínda que apuntaba que os contratos da antiga Astano "son o que xeran menor valor engadido", e pediu que "estas instalacións non afecten os sectores pesqueiro e marisqueiro", ademais de pedir que Navantia Fene, "ademais de estruturas eólicas, poda volver construír barcos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.