Bergondo, Bueu, Ferrol, O Carballiño e Verín, concellos "non colaboradores" co Defensor do Pobo
Así consta nun informe onde se sinalan as administracións que se demoran en responder os requirimentos do Defensor ou, mesmo, non chegan a contestar.
- O Defensor do Pobo detecta falta de comunicación e de seguimento no uso de herbicidas con glifosato en Galicia
- O Defensor do Pobo pide que se eliminen "canto antes" as restricións de visitas a hospitais
- O Defensor do Pobo advirte de que a saturación en Atención Primaria "prexudica a calidade e seguridade de pacientes"
Por E.P. | SANTIAGO DE COMPOSTELA | 18/03/2022 | Actualizada ás 18:26
Os concellos de Bergondo e Ferrol, na Coruña; Bueu, en Pontevedra; e O Carballiño e Verín, en Ourense, figuran como cinco dos 110 municipios "non colaboradores" sinalados polo Defensor do Pobo no seu informe de actividade de 2021. Así consta nun anexo do informe, que sinala a aquelas administracións que se demoran en responder os requirimentos do Defensor ou, mesmo, non chegan a contestar. De feito, a institución lembra que a lei vixente obriga a que as administracións contesten a este órgano sobre a información que precisa para as súas actuacións.
Entre os 110 concellos sinalados figura o de Bergondo, ao que o Defensor solicitou unha ampliación de información en xullo de 2019 sobre inactividade municipal, sen obter resposta, polo que o requirimento se repetiu en 2020 e 2021. No caso de Bueu, a información, sobre unha solicitude de copia de planos, foi requirida en febreiro de 2020 e en marzo de 2021. Do mesmo xeito, o Defensor solicitou información sobre a devolución de ingresos indebidos ao Concello de Ferrol en decembro de 2020 e en xuño de 2021.
No caso do Carballiño, a consulta facía referencia á necesidade dunha persoa de ter que desprazarse a entidades bancarias para pagar a taxa pola solicitude de certificado electrónico de empadroamento, cun último requirimento en maio de 2021, o terceiro. Finalmente, no caso de Verín, o organismo fixo en xuño de 2021 o terceiro requirimento de información sobre molestias por ruídos xeradas por un pub.
Entre os organismos non colaboradores figura tamén a Confederación Hidrográfica Miño-Sil, á que o Defensor do Pobo solicitou unha ampliación de información en relación á revisión da inscrición dun aproveitamento no rexistro de auga. Fíxose un terceiro requirimento o 6 de abril de 2021.
- O Defensor do Pobo detecta falta de comunicación e de seguimento no uso de herbicidas con glifosato en Galicia
- O Defensor do Pobo pide que se eliminen "canto antes" as restricións de visitas a hospitais
- O Defensor do Pobo advirte de que a saturación en Atención Primaria "prexudica a calidade e seguridade de pacientes"
