A Xunta acusa o Goberno do peche de Alu Ibérica: "É o único responsable desta situación"

O conselleiro de Economía en funcións, Francisco Conde, culpou o Goberno do peche da planta de Alu Ibérica na Coruña, tras a extinción dos contratos do persoal, e subliñou, no entanto, que a Xunta traballa na procura dunha alternativa vinculada co aluminio secundario.

A preguntas dos xornalistas sobre a situación da planta e se se está buscando algunha solución para dar carga de traballo, dixo que "lamentablemente o Goberno conseguiu o seu obxectivo". "Pechar Alu Ibérica e que en Galicia non se produza aluminio primario", afirmou, asegurando, ademais, que o Executivo central é "o único responsable desta situación de "non retorno" para o persoal.

Fronte a iso, defendeu a xestión do Executivo galego, do que expuxo que trasladou que "a solución" estaba "nun prezo enerxético equiparable ao resto de países europeos". Agora, asegurou que, tras elaborar un caderno de venda "sen axuda" do Executivo central, está a trasladarse a investidores para poder identificar "algunha actividade industrial". "En ningún caso produción de aluminio primario", precisou.

Respecto diso, incidiu en que están "a establecer contactos con socios industriais que poidan traballar con aluminio secundario" de cara a dar unha saída a "todos os traballadores vinculados a Alu Ibérica que queiran ter unha alternativa industrial", apostilou.

RESPOSTA DO GOBERNO

A subdelegada do Goberno na Coruña, María Rivas, replicou á Xunta e indicou que é ela quen ten "as competencias exclusivas en materia de industria". "O Goberno de España e o Ministerio de Industria estiveron desde o principio buscando solucións, sempre á beira do persoal para manter os postos de traballo e a actividade industrial", destaca en resposta ás manifestacións do titular de Economia.

Ademais, lamentou que "mentres as administracións cooperaron e colaboraron para facer fronte á situación, a Xunta deixaba soa o persoal". "Habería que preguntarse que fixo a Xunta en todo este proceso, que solucións propuxo e como actuou", argumenta a subdelegada do Goberno na Coruña.