Xosé Filgueira Valverde, elixido para as Letras Galegas 2015
Impúxose a Xela Arias, Ricardo Carvalho Calero, Celestino Fernández de la Vega e Manuel María. A súa vida política foi polémica xa que participou con cargos nos gobernos de Franco.
Por Galicia Confidencial | A Coruña | 05/07/2014 | Actualizada ás 14:12
O escritor e historiador Xosé Filgueira Valverde será o autor homenaxeado no Día das Letras Galegas en 2015.
Así o decidiu o pleno da Real Academia Galega (RAG) tras analizar as distintas propostas que estaban enriba da mesa. De feito, Valverde impúxose a Xela Arias, Ricardo Carvalho Calero, Celestino Fernández de la Vega e Manuel María.
O presidente da RAG, Xesús Alonso Montero, destacou do elixido a súa traxectoria como polígrafo, que foi un importante prosista e que fixo interesantes incursións no ámbito da poesía.
Traxectoria
Xosé Fernando Filgueira Valverde, naceu en Pontevedra o 28 de outubro de 1906 e finou na mesma vila o 13 de setembro de 1996. Ten abundante produción literaria e humanística. Foi un importante activista cultural e político. De feito, a súa traxectoria política foi criticada por ter rachado cos partidos da esquerda e ter participado con cargos nos gobernos de Franco.
Desde moi novo estivo involucrado en toda sorte de proxectos culturais. En 1923 -con só 17 anos- funda, xunto con Lois Tobío e Fermín Bouza Brey, o Seminario de Estudos Galegos onde dirixiu a sección de Historia da Literatura ata 1936. Anos despois dirixiría o Instituto Padre Sarmiento.
Participou na creación do Museo Provincial de Pontevedra en 1927, do que foi secretario ata 1942, ano no que se converte no seu director, mantendo a colaboración co Museo ata a fin dos seus días. Tamén chegou a dirixir a casa Museo de Rosalía de Castro.
Participou sempre do galeguismo, sendo membro desde os comezos do Partido Galeguista. En maio de 1935 encabeza un grupo de militantes deste partido en Pontevedra que abandonan o partido como protesta pola política de pactos coa esquerda, organizando a Dereita Galeguista. Cando se produciu o golpe militar contra a República apoiou os insurxentes con proclamas na radio e, posteriormente, ocuparía cargos públicos no franquismo como alcalde de Pontevedra entre 1959 e 1968, procurador en Cortes e, xa na democracia, como conselleiro de Cultura en 1982 e 1983.
Como alcalde de Pontevedra estimulou a acción cultural e promoveu numerosas medidas dirixidas á conservación do conxunto histórico e monumental de Pontevedra. Tamén foi durante ese período cando se permitiu a instalación da papeleira de Pontevedra, da empresa ENCE.
