A alcaldesa de Lugo pide por carta a Rueda unha reunión para "desploquear" proxectos da cidade

A alcaldesa de Lugo, a socialista Lara Méndez, solicitou por carta unha reunión ao novo presidente da Xunta, Alfonso Rueda, co obxectivo de "desbloquear" proxectos que afectan á cidade.

Lara Méndez confirmou que lle remitiu esa carta "solicitando unha reunión para tratar temas de importancia para Lugo, para traballar en harmonía con todas as administracións".

Xustifica este encontro formal porque "se bota en falla o compromiso por parte da Xunta e hai falla de implicación en proxectos da cidade, proxectos que dependen dela", dixo.

Entre eses proxectos "errados", enumerou "a Rolda Este, a finalización do Plan Paraday" e que o Museo da Romanización se leve ao antigo cuartel de San Fernando.

Méndez incidiu en que o que persegue é "desatascar e desbloquear" estes plans e "ter proxectos de futuro". "Se estamos durante vinte anos falando dos mesmos proxectos, isto impídenos a posibilidade de seguir crecendo e isto non pode ser", advertiu.

"Isto non se lle pode permitir a unha administración porque nas administracións, por enriba de intereses partidistas, ten que primar o ben común", agregou.

Finalmente, a alcaldesa esgrimiu que quere para Lugo "ter oportunidades e capacidade de crecemento". "Nesa reunión trasladareille a importancia de desatascar os problemas de outrora que nalgún caso superan os vinte anos", concluíu.