A Xunta deberá establecer controis para que as farmacias dispensen medicamentos hospitalarios veterinarios
A entidade denunciou que recibiu polo menos 17 queixas de profesionais porque diversas farmacias da provincia de Pontevedra denegaban a subministración de determinados medicamentos hospitalarios para uso veterinario ao alegar recibir instrucións da Consellería de Sanidade nese sentido.
Por E.P. | SANTIAGO DE COMPOSTELA | 06/06/2022 | Actualizada ás 15:55
O Tribunal Superior de Xustiza de Galicia (TSXG) condenou á Consellería de Sanidade a establecer o procedemento e os controis necesarios para a prescrición en farmacias de medicamentos de uso hospitalario con fins veterinarios.
O alto tribunal explica na sentenza que a Xunta incumpriu unha obrigación que emana directamente dunha norma con rango de lei e concedeulle un prazo máximo de seis meses para establecer ese procedemento.
Desta forma, estimou o recurso presentado polo Colexio oficial de Veterinarios de Pontevedra, que impugnou a inactividade administrativa da Consellería de Sanidade, pois, aínda que non existe unha normativa aprobada en Galicia, só a provincia de Pontevedra tiña ordes de prohibición desa dispensa.
A entidade denunciou que recibiu polo menos 17 queixas de profesionais porque diversas farmacias da provincia de Pontevedra denegaban a subministración de determinados medicamentos hospitalarios para uso veterinario ao alegar recibir instrucións da Consellería de Sanidade nese sentido.
Os maxistrados indican na resolución que se trata dunha omisión regulamentaria "que implica o incumprimento dunha obrigación de rango legal". Ademais, destacan que "dificulta o normal exercicio da profesión veterinaria nunha parte do territorio de Galicia".
"MENOSCABO INXUSTIFICADO" DO BENESTAR DOS ANIMAIS
A omisión do procedemento, segundo a sentenza, é "dobremente significativa na esfera dos dereitos". Por unha banda, segundo a Sala, para os da persoa propietaria do animal, pois "vai sufrir un prexuízo derivado da falta de administración do medicamento, que pode redundar na expectativa de vida ou no benestar, podendo causar non só danos ao seu patrimonio, senón tamén sufrimento polo vínculo co animal".
E, por outro, nos do animal, pois os xuíces sinalan que a falta do medicamento supón "un menoscabo inxustificado do benestar ou a sanidade dun ser sintiente, categoría diferente e superior ás cousas, recoñecida desde a Lei 17/2021". Obviar esta circunstancia, segundo o fallo, "supón tamén un deixamento inxustificado en relación coa esixencia que en materia de benestar animal impón o artigo 13 do Tratado de Funcionamento da Unión Europea".
O TSXG subliña que, neste caso, trátase dunha norma con rango de lei establece unha obrigación, a de prescrición veterinaria para acceso a determinados medicamentos, e, para ese acceso, débese implantar un desenvolvemento regulamentario.
Ese desenvolvemento é realizado parcialmente polo Goberno do Estado en 2010 nun Real Decreto, pero só nos seus elementos básicos, pois deixa á autoridade autonómica competente a articulación do procedemento e controis.
A Sala recalca que ese mandato legal carente de desenvolvemento suficiente en Galicia "non resulta indiferente desde o punto de vista dos deberes e os dereitos", porque ten "unha incidencia directa no exercicio da profesión veterinaria, no benestar animal e nos dereitos das persoas posuidoras", polo que estimou o recurso presentado pola entidade colexial. Contra a sentenza cabe presentar recurso de casación.
