Un de cada catro vehículos en Galicia son rexeitados na ITV

Un de cada catro vehículos en Galicia son rexeitados na primeira inspección na ITV, segundo AECA-ITV, de maneira que ocupa, así, a 2ª posición no conxunto do Estado por porcentaxe de rexeitamento.

Estes coches xeran unha facturación de 220 millóns de euros aos talleres galegos, o que representa o 10% do total facturado polos negocios de reparación en España, que supera os 2.300 millóns de euros, segundo Solera, que move máis de catro millóns de reparacións anuais.

Se se amplía a fotografía ao ámbito estatal, son máis de 17 millóns de coches en España os que acoden á ITV, aínda que dous de cada dez son rexeitados nunha primeira inspección.

Neste sentido, unha ollada aos danos dos vehículos depara que se detectaron máis de 20 millóns de danos, dos que preto de 3 de cada 10 foron graves e o resto, leves.

Todos eles xeran un impacto de máis de 2.300 millóns de euros aos talleres en España, dos que 1.375 millóns corresponden aos danos graves e os 950 millóns restantes, aos leves. O tipo de irregularidade máis habitual é no motor e transmisión e no conxunto que forman as rodas, os pneumáticos, os eixos e a suspensión.

AGUDÍZASE A ABSTENCIÓN DA ITV

Doutra banda, aínda que oito de cada dez vehículos (os de máis de 4 anos) en circulación deben acudir a pasar a ITV, unha cuarta parte, preto de 6 millóns, non fan sequera acto de presenza. Esta abstención provoca que os talleres deixen de facturar 1.000 millóns de euros, segundo Solera. En concreto, son preto de 170 euros por vehículo.

"Estas cifras pon de relevancia as múltiples arestas dun problema estrutural como é un alto número de vehículos que circulan sen a ITV en vigor", tal como lembra AECA-ITV, "co correspondente risco para a seguridade viaria". A abstención, prosegue, agudizouse coa pandemia e co propio envellecemento do parque. "Seis de cada dez coches superan a década de antigüidade e existe unha correlación directa entre idade e visitar ou non a estación de ITV", sinala.