Reabre ao tráfico a N-120, cortada pola proximidade do incendio declarado na Cañiza

A circulación xa foi restablecida na N-120, no punto quilométrico 612, tras ser cortada boa parte da mañá deste domingo pola proximidade do incendio declarado na Cañiza (Pontevedra).

Segundo informaba o 112 este domingo, a circulación restrinxíase primeiro na A-52 polos motivos xa citados para, máis tarde, cortar tamén a estrada nacional.

O lume que afecta o concello pontevedrés da Cañiza, iniciouse na parroquia de Oroso, onde se declarou a Situación 2 como medida preventiva pola proximidade das chamas a un polígono industrial.

Leva calcinadas, polo momento, 25 hectáreas. Para a súa extinción mobilizáronse un técnico, seis axentes, nove brigadas, sete motobombas, dúas pas, nove avións e catro helicópteros.

Cabe destacar ademais que, poucos quilómetros despois de onde se produciu o corte, no punto 620, rexistrouse este domingo un sinistro entre tres motos, cun dos motoristas ferido grave.