Un xulgado anula a comisión de servizos do técnico de Urbanismo de Sada

O Xulgado do Contencioso-Administrativo número 1 da Coruña aceptou a demanda da Unión Sindical Obreira (USO) contra o decreto da Alcaldía de Sada para o nomeamento, en comisión de servizo, do posto de técnico da Administración Xeral de Urbanismo, Medio Ambiente e Policía Urbana.

Segundo informa a central sindical e recolle o fallo, de data 22 de xullo, o xulgado estima as pretensións da parte demandante, o secretario xeral da Sección Sindical de USO Sada, que solicitaba que se anulen as resolucións recorridas por non ser axustadas a dereito.

A sentenza sinala que, "a pesar de que na Relación de Postos de Traballo" o citado emprego "está recollido como de vínculo funcionario e da escala de Administración Xeral, na convocatoria e ao longo de todo o expediente convocouse o posto recollendo que a escala é a de Administración Especial".

Tamén apunta que "en todo caso outorgarase prioridade ao persoal funcionario de carreira que pertenza á mesma escala do posto que sexa obxecto de cobertura". Así conclúe que "non é controvertido que o demandante tiña preferencia sobre o candidato designado".

Tamén estima procedente "recoñecer a favor do recorrente a indemnización solicitada consistente na diferenza de complemento específico entre o posto de traballo a que se refire a convocatoria e o posto ocupado polo demandante, polo prazo dun ano que se mantivo o nomeamento". Contra a sentenza, que non é firme, cabe recurso de apelación.