Atopan 3 quilos de haxix nunha bolsa baixo unhas rocas en Poio
O valor do achado é de aproximadamente 4.000 euros,
Por Europa Press / Redacción | SANTIAGO DE COMPOSTELA | 24/09/2022 | Actualizada ás 12:43
A Policía Local abriu unha investigación para atopar o responsable de tres quilos de sustancias estupefacientes, supostamente haxix, que foron atopados nunha leira de Poio grazas á colaboración cidadá.
A droga apareceu o pasado martes, 20 de setembro, nunha parcela en Camiño Real de Chancelas, envolvida nunha bolsa e escondida debaixo dunhas rocas. Tras recibir o aviso e incautarse da sustancia, a Policía Local abriu dilixencias de investigación para dar coa persoa responsable, que se podería enfrontar a un suposto delito contra a saúde pública.
Segundo os axentes, o valor do achado é de aproximadamente 4.000 euros. A Policía Xudicial será a encargada agora de continuar coa investigación.
