A Xunta súmase á demanda do Estado para reclamar a titularidade pública de bens mobles do Pazo de Meirás

A Xunta presentou este luns no Xulgado de Primeira Instancia número 70 de Madrid un escrito para sumarse á demanda da Avogacía do Estado para reclamar á familia Franco a propiedade pública de 564 bens mobles que se atopan no Pazo de Meirás, en Sada (A Coruña).

A través dun comunicado, o Goberno galego anunciou que se suma á demanda interposta o pasado día 21 de setembro ao respecto da consideración de bens de dominio público e patrimonio público, tanto de obxectos procedentes da etapa de Emilia Pardo Bazán (transmitidos en 1938) como dos instalados por Francisco Franco cando foi xefe do Estado durante a ditadura.

A Xunta "reforza a postura que leva mantendo desde o inicio do proceso" e apoia "a unidade de acción" co resto de administracións --tamén o Concello de Sada está inmerso no procedemento--, co obxectivo de traballar "de forma leal e coordinada para favorecer os intereses xerais de Galicia".

De feito, o Executivo autonómico lembra que a demanda por parte do Estado era un paso que "levaba solicitando desde hai moito tempo". A vía xudicial é, para a Xunta, "a única forma de garantir a propiedade destes bens", como xa ocorreu exitosamente co propio Pazo de Meirás e algúns elementos vinculados.

Por iso, no escrito presentado ante o xulgado de Madrid, a Administración galega expón o seu "interese lexítimo" para participar neste preito, como xa o fai no que está aberto sobre a titularidade do inmoble.

A Xunta defende que a permanencia dos obxectos relacionados con Emilia Pardo Bazán e Francisco Franco --cando era xefe do Estado-- no complexo de Meirás "faría máis transmisible e comprensible os acontecementos históricos que alí se produciron".

O pazo de Meirás o día da súa devolución ao Estado | Fonte: M.Dylan - Europa Press