A área de endoscopias do Hospital comarcal de Barbanza comezará a funcionar antes de que remate este ano

O conselleiro de Sanidade, Julio García Comesaña, anunciou a posta en servizo da nova área de endoscopias do Hospital comarcal de Barbanza antes de rematar 2022. Fíxoo nunha visita ao centro, enmarcada nos actos do 25 aniversario da infraestrutura hospitalaria, onde explicou ademais que xa está acabado o groso da obra da nova zona, na que a Xunta investiu 620.000 euros.

Este novo departamento conta con 130 metros cadrados, o que supón un incremento da superficie dedicada á realización de endoscopias dixestivas. O equipamento inclúe melloras no ámbito tecnolóxico, cun bisturí eléctrico dixestivo e monitores de parámetros fisiolóxicos básicos. Conta tamén cun sistema de Endoscopia dixestiva, conformado por unha torre de endoscopia dixestiva e os equipos de reprocesamento con dúas lavadoras para a desinfección dos endoscopios, un armario de secado e almacenamento esterilizado, así como catro monitores multiparamétricos de última xeración.

Aseguran que esta actuación proporcionará unha mellor calidade e maior confortabilidad e repercutirá ademais na modernización dos procesos de asepsia e en mellores condicións tamén para que os profesionais dos que dispón o hospital poidan realizar da mellor maneira posible o seu labor.

Doutra banda, Comesaña tamén anunciou que o proxecto de orzamentos da Consellería para 2023 inclúe tamén 200.000 euros para iniciar as obras de ampliación da área de hospitalización do centro sanitario.

Lembrou ademais que en 2020 a Xunta finalizou as obras de ampliación do 40% da superficie da súa área de urxencias, cun investimento de 1,8 millóns de euros.