Alternativa dos Veciños denunciará os acordos plenarios que fixan soldos e dietas para a nova Alcaldía de Sada tras a moción de censura

Alternativa dos Veciños de Sada, formación á que pertencía a actual alcaldesa, María Nogareda, antes de ser expulsada por promover unha moción de censura contra o xa exrexedor, Benito Portela, avanzou que denunciará os acordos plenarios que incumpran a lei.

Nun comunicado, critica que os "concelleiros tránsfugas e golpistas de Sada", en referencia aos edís que integraban esta formación, pero tamén os que concorreron polo PSOE e o PP, "tardasen moi pouco en convocar un pleno para asignarse soldos e dietas para os seis meses durante os que van ocupar o Concello".

"É alarmante que os técnicos que teñen que velar pola legalidade do Concello non informasen da improcedencia deste acordo por ser tránsfugas". "E máis alarmante é aínda que a secretaria municipal non comunicase ao pleno os dous escritos de expulsión presentados por Alternativa dos Veciños antes da moción de censura".

Con todo, subliña que a intervención municipal advertiu "que os soldos son ao cargo e non ás persoas e que terá que analizarse a situación dos tránsfugas", sinala sobre o pleno.

Por todo iso, Alternativa dos Veciños avanza que presentará as correspondentes denuncias "ao amparo das leis que rexen as administracións locais".

A nova alcaldesa de Sada, María Nogareda | Fonte: M. Dylan