Por Galicia Confidencial | Compostela | 28/11/2014 | Actualizada ás 10:00
“Os límites da decencia, que hai tempo que foron saltados por este goberno, quedan xa a tanta distancia de Feijoo e o seu goberno, que o pudor lles é alleo”. Así comeza un comunicado da CIG-Autonómica con críticas moi duras contra o Executivo de Feijóo por contratar ao ex vicepresidente da Xunta con Albor e agora politólogo e columnista de La Voz de Galicia, Xosé Luis Barreiro para impartir un “curso de ética”.
Precisamente este “curso de Ética Pública para empregados públicos” está organizado conxuntamente pola Fundación Santiago Rey Fernández-Latorre, vinculada a La Voz de Galicia, e a Xunta, a través da Escola Galega de Administración Pública (EGAP) De feito, Barreiro foi o galardoado este ano co premio desta fundación en presencia do presidente do Goberno español, Mariano Rajoy.
A conferencia do politólogo e ex político versará sobre os compoñentes éticos, políticos e xurídicos dunha sociedade limpa de corrupción. E é isto, precisamente, o que critican desde CIG-Autonómica ao lembrar que Barreiro Rivas foi un dos primeiros políticos galegos condenados por prevaricación e que o Tribunal Supremo condenou a 6 anos de inhabilitación especial para cargos públicos.
“Non se pon en cuestión a competencia técnica desta persoa, senón a incompatibilidade moral que produce o feito de ter sido condenado por un delito contra a Administración Pública nun dos supostos máis graves, a prevaricación, e participar de ponente nun curso sobre ética dos empregados/as públicos/as. Barreiro pode ser obxecto, pero non suxeito da charla!”, apunta este sindicato nun comunicado no que responsabiliza a Xunta por contratalo.
Entre as materias deste curso están a importancia e prioridade das medidas preventivas na loita contra a corrupción, delitos de malversación e de fraudes á Administración, delitos sobre a ordenación do territorio e o urbanismo, os compoñentes éticos, políticos e xurídicos dunha sociedade limpa, a dialéctica entre sistema e baleiro en tempos de crise, delitos de prevaricación e de negociacións e actividades prohibidas aos funcionarios públicos, reflexións sobre a eficacia da actuación xudicial contra a corrupción, delitos de suborno e tráfico de influencias e comportamentos corruptos: da tolerancia á prevención.
Nas xornadas tamén participarán o fiscal superior de Galicia, Carlos Varela, que incidirá nas medidas preventivas na loita contra a corrupción e o catedrático de Dereito Penal Enrique Orts Berenguer, cunha conferencia que versará sobre delitos de malversación e de fraudes á Administración.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.