Por Galicia Confidencial | Compostela | 23/01/2023 | Actualizada ás 22:28
A pandemia da Covid trouxo mortes e penuria económica. Unha situación que a UE tentou resolver proporcionando financiamento adicional a través dos fondos REACT-EU dende 2020 a 2022 para os actuais programas de cohesión 2014- 2020 no marco do Fondo Europeo de Desenvolvemento Rexional e o Fondo Social Europeo, así como para o Fondo de Axuda Europea ás Persoas máis Desfavorecidas. Foron 10.000 millóns de euros que recibiu neste concepto o Estado, dos que arredor de 400 foron destinados a Galicia.
De xeito excepcional, a UE distribuíu estes fondos a través do Fondo Europeo de Desenvolvemento Rexional (FEDER), o Fondo Social Europeo (FSE), o Fondo Europeo de Axuda ás Persoas máis Desfavorecidas (FEAD), así como a Iniciativa de Emprego Xuvenil (IEJ). Tamén poden financiarse con eles medidas de asistencia técnica. No caso de Galicia, o programa operativo FEDER 14-20 modificouse para incluír 305 M€ de REACT-EU e o programa operativo FSE 14-20 de Galicia, pola súa banda, foi modificado para incluír 91M€ destinados a apoio para o acceso ao mercado de traballo, a creación de postos de traballo e o emprego de calidade.
No caso dos REACT-EU e o programa operativo FSE 14-20 de Galicia os fondos están destinados a fomento da investigación e innovación sanitaria (9,5%), apoio a investimentos que contribúan á transición cara a unha economía dixital (24,1%), apoio ás pemes en sectores cun elevado potencial de creación de emprego e apoio a sectores especialmente afectados pola crise da Covid-19 (7,8% e 6,6%, respectivamente), apoio aos investimentos que contribúan á transición cara a unha economía verde (24,0%), apoio aos investimentos en infraestruturas que presten servizos básicos aos cidadáns, especialmente no ámbito sanitario (24,8%) e asistencia técnica (3,1%).
E A ONDE VAI ESE DIÑEIRO?
E para que destina Galicia estes fondos?. Pois se se fai unha busca dos proxectos nos que a Xunta utiliza parte destes fondos atopamos que parte deles van para fins que pouco teñen que ver co fins das axudas, entre eles, a realización de sendas peonís. Así, a Axencia Galega de Infraestruturas utilizará 1,1 milóns destas axudas para realizar sendas peonís na AC-131 entre Peteiro e O Baño (Mugardos) cun custe de 534.668,54 euros; a beirarrúa na PO-315 no treito: Beluso-A Chadiza que custará 327.617,64 euros e a senda na AC-524 (concello de Frades) por 241.008,09 euros. Curiosamente, a Xunta non utiliza estes fondos para a redefinición itinerario peonil e ciclista na AC-552 no treito: Pastoriza-Vilarrodís cun custe de 118.542,33 euros.
Pero o Goberno galego tamén utiliza esta subvención para o suministro de equipamiento electromédico con destino ás áreas reformadas correspondentes á fase 0 del Plan Director do Hospital Universitario A Coruña por 302.450,51 euros ou a proxectos de moita máis envergadura. Entre eles, a contratación do despregamento e posta en servizo da rede galega da internet das cousas (iCousas), para a autoprestación de servizos de comunicación en Galicia por 1.121.773,14 euros ou a subministración dunha infraestrutura baseada en tecnoloxías cuánticas da información. Un proxecto do Cesga cun custe de 13.915.000,00 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.