Por Europa Press / Redacción | SANTIAGO DE COMPOSTELA | 06/02/2023 | Actualizada ás 10:26
Un home resultou ferido na noite deste domingo ao envorcar o vehículo que conducía sobre as vías do tren no municipio lucense de Ribas de Sil.
Segundo a información do 112-Galicia, foi un familiar do accidentado o primeiro que alertou aos servizos de emerxencias pouco antes das 23,00 horas. Posteriormente, a propia vítima chamou ao 112 para contar que perdera o control do vehículo por mor dos efectos da xeada na estrada e saíu da vía.
Foi no quilómetro 2 da LU-P-5302, en Ribas de Sil, e, para retirar o vehículo sinistrado foi necesario cortar a circulación ferroviaria ata as 1,00 horas da madrugada. O home puido saír polos seus propios medios do coche e foi atendido polo 061.
Ademais, no operativo participaron efectivos do GES de Quiroga-Folgoso do Courel, a agrupación de voluntarios de Protección Civil e a Garda Civil de Tráfico, así como persoal de mantemento e de Adif.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.