PSOE advirte e á Xunta que "debe avaliar ben o impacto" da Mina de San Finx na ría de Muros e Noia
Esixiulle ao Goberno galego e á Comisión Europea ser "transparentes" coas actividades que se desenvolven
Por Europa Press / Redacción | SANTIAGO DE COMPOSTELA | 09/02/2023 | Actualizada ás 19:43
O eurodeputado do PSOE Nicolás González Casares instou tanto á Comisión Europea como á Xunta a ser "transparentes" coas actividades que se desenvolven na mina de San Finx, en Lousame (A Coruña), despois das medidas a favor da canteira aprobadas por ambas as institucións.
A través dun comunicado, o socialista lembra que a Comisión Europea destinou case 7 millóns á mina no proxecto 'Next' do programa marco Horizonte 2020, unha axuda xustificada coa "autosuficiencia europea" con respecto á produción de wolframio.
Entre as accións contempladas nesta iniciativa inclúese a toma de mostras no quinto nivel da mina, aberto sen avaliación de impacto ambiental. "Segundo a información dispoñible, a auga que alagaba esta planta foi bombeada ilegalmente e vertida ao río ata a finalización do proxecto, en 2020", denuncia González Casares.
Por iso, o eurodeputado galego solicita á Comisión que sexa "transparente" coas actividades que se desenvolven na mina, tendo en conta que o Defensor do Pobo Europeo xa solicitou información o pasado mes de novembro, cando se someteu a exposición pública o proxecto de recuperación ambiental para a depuración das augas residuais da mina.
A maiores, a semana pasada a Xunta, a través de Augas de Galicia, autorizaba unha vertedura destas augas residuais ao arroio de Rabaceiros. A autorización, cuxa vixencia ten cinco anos prorrogables, está supeditada ao cumprimento de 18 requisitos e á atención das normas de calidade ambiental.
Neste contexto, o eurodeputado do PSOE advirte ao Goberno galego que debe "avaliar ben o impacto" que pode ter sobre a ría de Muros e Noia. En calquera caso, dirixiuse á Comisión para coñecer se adopta algunha medida ante esta autorización da Xunta.
