Galicia gastou un 52% menos nas rebaixas respecto de 2022

O gasto medio dos consumidores galegos nestas rebaixas de inverno situouse en 163 euros, fronte aos 339 euros de media rexistrado o ano pasado, o que supón un descenso do 52%, segundo o último Zoom do Observatorio Cetelem.

Esta cifra tamén supón un gasto medio inferior ao da media española, que se situou en 276 euros. En xeral, segundo o estudo realizado sobre unha mostra de 6.000 enquisas en liña a razón de mil mensuais, o 42% dos galegos gastou menos nas rebaixas deste ano.

Tamén descende, en sete puntos, a porcentaxe de compradores que realizou o mesmo desembolso que nas rebaixas do ano anterior (34%); e cae tres puntos o daqueles que manifestan gastar máis que no mesmo período do ano anterior (24%).

Un 34% dos enquisados que desembolsaron menos nestas rebaixas manifesta conter o seu gasto a consecuencia da inflación. En calquera caso, os produtos máis adquiridos foron roupa (73%), calzado e complementos (37%), téxtil e calzado de deportes (25%), perfumes (14%), e libros (13%).

Unha persoa camiña con varias bolsas de compras das rebaixas | Fonte: Ricardo Rubio - Europa Presss