Inditex, un imperio que non para de crecer a pesar da guerra, a crise bancaria e a inflación

Inditex, a maior empresa cotizada española, anunciará este mércores un beneficio neto anual de máis de 4.000 millóns de euros, superando amplamente as súas cifras prepandemia, a pesar de que no seu exercicio fiscal de 2022 deixou Rusia e renunciou así ao que fora o seu segundo mercado por número de tendas. E iso, a pesar da guerra en Ucraína, a crise bancaria e a galopante inflacción.

O propietario de Zara e Massimo Dutti, entre outras marcas, difundirá o día 15 as contas do seu último exercicio fiscal, que arrincou en febreiro de 2022, cando comezou a invasión rusa de Ucraína, o que levou ao grupo téxtil fundado por Amancio Ortega -o home máis rico de España- a pechar máis de 500 tendas en Rusia.

UN 15 % MÁIS QUE O SEU RÉCORD PREPANDÉMICO

O consenso dos analistas solicitado por Bloomberg apunta a que a empresa podería pechar o ano fiscal 2022 cun beneficio neto de 4.180 millóns. De ser así, supoñería un 28,9 % máis que os 3.243 millóns gañados o exercicio anterior e un 14,8 % máis que en 2019, cando o grupo selou con 3.639 millóns o mellor ano da súa historia (ao que logo lle seguiu a fochanca da covid).

Renta4 prevé que o seu beneficio aumente un 11 % respecto ao nivel precovid e un 23 % respecto a 2021, ata alcanzar os 4.040 millóns, á vez que prognostica que as vendas roldarán os 32.495 millóns, o que tamén supoñería unha cifra récord, tras superar nun 15 % os de 2019 e nun 17,2 % os de 2021.

2023: INFLACIÓN NOS CUSTOS E SUBIDA DE SALARIOS

Haberá que estar pendentes tamén o mércores do avance que poida dar a compañía sobre a evolución das vendas no arranque deste ano e a previsión que poida facer da súa marxe bruta, tendo conta o actual contexto de elevada inflación e o acordo alcanzado en España para elevar os salarios dos seus empregados.

O mes pasado Inditex pactou cos sindicatos unha subida media salarial para o 80 % dos empregados de tenda de todas as súas marcas de entre o 20 % e o 25 %, segundo os cálculos sindicais.

Igualmente, podería dar algunha indicación de se ten intención de subir os prezos e en que medida. Durante o exercicio 2022 subiunos ao redor de "medio díxito simple", mentres tratou de manter un control "rigoroso" dos gastos operativos para que crezan menos que as vendas.

A PRIMEIRA PRESENTACIÓN SEN PABLO ISLA

Esta será a primeira presentación de resultados anuais do grupo -que conta con máis de 165.000 empregados en todo o mundo- que correrá a cargo de Óscar García Maceiras, que asumiu o cargo de conselleiro delegado de Inditex en novembro de 2021.

Ademais, será a primeira na que Marta Ortega, a filla menor de Amancio Ortega, xa ostente a presidencia non executiva do grupo, que asumiu o 1 de abril de 2022, fai xa case un ano. Así, no acto de presentación dos resultados non estará xa Pablo Isla, ata abril do ano pasado presidente de Inditex.