Detido tras roubar en 8 vehículos dun garaxe comunitario en Ourense
Detidos outros dous individuos tras ser sorprendidos "in fraganti" roubando nun coche na Coruña.
Por Europa Press / Redacción | OURENSE | 14/03/2023 | Actualizada ás 10:12
Axentes da Policía Nacional da Comisaría de Ourense detiveron a un home como presunto autor do delito de roubo con forza cometido en varios vehículos que estaban estacionados nun garaxe comunitario.
Segundo informaron fontes policiais, todos os roubos cometéronse na mesma madrugada, a do 7 de marzo, e resultaron afectados 8 coches. O presunto autor dos feitos produciu danos en todos os vehículos e conseguiu levar, entre outros obxectos, caixas de ferramentas e documentación.
A investigación foi levada a cabo por axentes da UDEV, que lograron identificar ao presunto ladrón, procedendo á súa detención o pasado xoves. O arrestado xa foi posto a disposición xudicial, mentres que a maior parte dos efectos subtraídos foron recuperados e devoltos aos seus lexítimos propietarios.
MÁIS ROUBOS DE COCHES NA CORUÑA
Por outra banda, tamén a Policía Nacional detivo na madrugada deste luns a dous homes que foron sorprendidos polos axentes mentres roubaban un vehículo estacionado no centro da Coruña.
Os feitos ocorreron ao redor das 4,00 horas da madrugada do luns, cando varios axentes de Seguridade Cidadá sorprenderon 'in fraganti' a dous homes no interior dun vehículo estacionado na rúa Juan Florez, ao que accederan rompendo un dos portelos. Xa tiñan roubado outros dous previamente.
