O Plan de Recuperación do Goberno está tendo xa os seus efectos na comarca do Ortegal segundo Miñones
José Miñones detallou que un dos obxectivos destes fondos son "protexer os dereitos dos veciños e ampliar os servizos públicos e a calidade de vida", xa que desde o seu punto de vista "vivir no Ortegal é un privilexio".
Por E.P. | SANTIAGO DE COMPOSTELA | 15/03/2023 | Actualizada ás 17:20
O delegado do Goberno en Galicia, José Miñones, destacou o "enorme impacto" que está a ter o Plan de Recuperación do Goberno para a transformación verde e dixital na comarca do Ortegal e, en concreto, no municipio de Cariño, cun investimento de máis de dous millóns de euros neste municipio. Estes fondos están destinados á mellora de servizos públicos e a transición verde e dixital, á vez que servirán para aproveitar o gran potencial deste territorio para o turismo sustentable.
Nunha visita realizada no mediodía deste mércores ao Concello de Cariño, onde se reuniu co seu alcalde, José Miguel Alonso Pumar (PSOE), Miñones supervisou os investimentos do Goberno e trasladou as oportunidades das novas convocatorias do Plan de Recuperación para o municipio e a súa veciñanza.
Na súa intervención, José Miñones detallou que un dos obxectivos destes fondos son "protexer os dereitos dos veciños e ampliar os servizos públicos e a calidade de vida", xa que desde o seu punto de vista "vivir no Ortegal é un privilexio".
XEOPARQUE
Por outra banda, Miñones detallou o apoio do Goberno de España "á candidatura do Cabo Ortegal para alcanzar o recoñecemento da Unesco como Xeoparque", unha iniciativa que está a ser impulsada por sete municipios, como son Cariño, Cedeira, Cerdido, Moeche, Ortigueira, San Sadurniño e Valdoviño.
Así, Miñones destacou que están "a sentar as bases do turismo do futuro, un turismo máis verde, máis sustentable e aberto ao mundo a través das tecnoloxías dixitais" e que "vai situar ao Ortegal como un destino de referencia dentro deste novo modelo".
Por último, o delegado do Goberno lembrou que o Ministerio para a Transición Ecolóxica e o Reto Demográfico "xa financiou con preto de 650.000 euros a renovación de toda a iluminación pública do municipio", ademais de permitir a uns 1.300 fogares e empresas de dispor dunha conexión a Internet de alta velocidade grazas ao Plan UNICO-Banda Ancha.
