Como concienciar á rapazada da importancia do cambio climático

Un cento de alumnos e alumnas de ESO dos concellos de Boiro, Brión, Bueu, Silleda e Viana do Bolo participarán este mércores, 19 de abril, nun encontro creativo en Silleda para reflexionar sobre o impacto do cambio climático e a súa relación coa desigualdade social, así como para compartir propostas de accións para un futuro máis sostible a través da comunicación dixital.

O encontro intercentros, que decorrerá no Auditorio de Bandeira, forma parte do proxecto de innovación educativa EpDLab, desenvolvto pola ONGD Agareso (Asociación Galega de Comunicación Social) co financiamento de Cooperación Galega. O encontro recibe o nome de hackaton, "un evento no que, nun breve espazo de tempo, un grupo de persoas intentan crear prototipos ou solucións para unha problemática dada".

En concreto, os mozos e mozas participantes traballarán, de forma colectiva, no deseño e elaboración de contidos de comunicación dixital para sensibilizar sobre os efectos do cambio climático na vida das persoas a nivel global e para promover accións concretas cara un futuro máis sostible.