Por Europa Press / Redacción | SANTIAGO DE COMPOSTELA | 19/04/2023 | Actualizada ás 13:29
O presidente da Xunta, Alfonso Rueda, reiterou que a visita do rei emérito "non é unha mala cousa, senón todo o contrario" desde o punto de vista da promoción turística da comunidade galega.
A preguntas dos xornalistas durante un acto en Salvaterra, Rueda insistiu no dito "estes días mesmo agora que parece que é inminente a chegada", e que "non hai ningún tipo de comunicación oficial polo menos á Xunta", co cal "se trataría dunha viaxe eminentemente privada". "Se se confirma, como parece, a presenza do rei emérito aquí, desde o punto de vista de posicionamento de Galicia, en canto a que se falará moito durante estes días de Sanxenxo e de Pontevedra e de Galicia, desde o punto de vista da promoción turística non é unha mala cousa", sinalou.
"Fóra diso" evitou facer "valoracións sobre a súa presenza e as circunstancias que a rodean", posto que non lle corresponde facelas, segundo dixo. En todo caso, repetiu que agradece que, "dentro de moitos sitios, unha vez que decidiu desprazarse a España, podería elixir, que elixa a Galicia non é unha mala cousa senón todo o contrario" para a promoción da comunidade.
PONTÓN
Pola súa banda, a portavoz nacional do BNG, Ana Pontón, cuestionou a protección policial que se lle dá ao rei emérito en cada viaxe a España e, en concreto, a Sanxenxo, onde vai pasar uns días. Con todo, advertiu que cada visita de Juan Carlos de Borbón fai aumentar "a conciencia republicana".
En declaracións aos medios en Vigo, a líder nacionalista observou que "é evidente que o emérito ten unha fortuna que non está claro cal é a súa orixe" e que, "calquera cidadán que tivese un problema con Facenda, non tería á Policía protexéndoo, senón iría máis ben a esixirlle responsabilidades".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.