O Consello da Cultura Galega acolle un debate este xoves sobre a repercusión do 15M

A xornalista e escritora Cristina Fallarás e o deseñador gráfico David Rodríguez participarán este xoves nunha nova sesión do ciclo Pensarmos, organizado polo Consello da Cultura Galega (CCG) e, nesta ocasión, baixo o título Pensarmos "O 15-M doce anos despois: crise do Réxime ou Restauración?".

A sesión celebrarase na sede de Portas Ártabras - Amigos dos Museos de Galicia da Coruña, ás 18,00 horas. Alí, Fallarás e Rodríguez conversarán co avogado Xoán Antón Pérez Lema sobre o movemento do 15-M e o que supuxo para España e para Galicia. Tal e como apunta nun comunicado o CCG, a xornada é presencial e non se poderá seguir en directo, pero será gravada e estará proximamente dispoñible na hemeroteca do Consello.

Celia Pereira Porto será a encargada de abrir o debate, moderado por Lema. "Queremos dilucidar que supuxo, quen o leu ben, quen mal, como cambiou a sociedade, se houbo unha posta en valor e se supuxo tamén a apertura de novos temas", explica o moderador. Considera que é necesario avaliar se o 15-M "conseguiu o resultado dunha impugnación do réxime que quería transformar radicalmente ou se realmente provocou outro tipo de defensa dese réxime desde posicións máis restauracionistas".

Protesta dos indignados do 15M en Ourense en 2011 | Fonte: Monty Gc Aberto