O BNG de Ourense denuncia ante Fiscalía os audios do irmán de Baltar e pide que se investiguen
"Poderiamos estar diante da comisión dun presunto delito de suborno continuado, previsto no artigo 419 do Código Penal, así como dun delito de prevaricación, previsto no artigo 404", sinalou Bernardo Varela.
Por Europa Press / Redacción | OURENSE | 29/05/2023 | Actualizada ás 18:14
O BNG formalizou este luns unha denuncia ante a Fiscalía para solicitar que se investigue a información difundida polo períodico Público o pasado fin de semana, sobre uns audios do irmán do presidente da Deputación, Manuel Baltar, nos que supostamente se refire ao cobro de 'mordidas'.
Os nacionalistas ourensáns formalizaron esa denuncia tras publicarse esa información, que aludía a mensaxes do familiar de Baltar relativos a pagos por parte de empresas construtoras. Segundo sinalou o deputado provincial (en funcións) Bernardo Varela, "nas mensaxes mesmo se fala dunha das máximas adxudicatarias da propia Deputación".
Por esas informacións, "nas que se vincula directamente ao actual presidente do ente provincial, Manuel Baltar", é polo que o BNG decidiu acudir á Fiscalía, "para pór no seu coñecemento esta información e solicitar que se investigue". Así, "de ser o caso", que o Ministerio Público determine a "responsabilidade penal" que poida derivarse deses feitos.
"Poderiamos estar diante da comisión dun presunto delito de suborno continuado, previsto no artigo 419 do Código Penal, así como dun delito de prevaricación, previsto no artigo 404", sinalou Bernardo Varela, que expresou a súa esperanza desa denuncia "sexa vehiculizada nas canles xurídicas pertinentes".
