Detectan un foco de tuberculose nun instituto de Ourense

A Consellería de Sanidade confirmou que realiza un seguimento dun estudo de contactos dun caso de tuberculose nun centro escolar da área Sanitaria de Ourense, a través do cal se detectaron 19 positivos de tuberculina.

O departamento autonómico trasladou que ante a aparición do caso púxose en marcha o protocolo existente en Galicia para avaliar o risco potencial de transmisión e detectar precozmente posibles contaxios, para o que se organizou o estudo dos seus contactos, priorizando os máis estreitos (os que conviven máis de seis horas diarias co enfermo).

Neste momento, no estudo detectáronse 19 persoas coa proba positiva de tuberculina, ás que continúan realizándolles as probas rutineiras para verificar a existencia da enfermidade, xa que a proba positiva por si soa só indica un contacto previo co bacilo da tuberculose. Ademais, tamén se avalía a pertinencia do tratamento antiinfeccioso ou preventivo e outras medidas sanitarias a seguir.

Neste contexto, a Dirección Xeral de Saúde Pública traslada unha mensaxe de tranquilidade posto que, segundo apunta, "está a axilizarse a realización de todas as actividades necesarias para limitar a transmisión desta enfermidade e a aparición de novos casos de infección/enfermidade".

Tuberculose.