O PP acusa a Gonzalo Caballero de "dar autobombo ao sanchismo" e o BNG di que só quere poñerse medallas
O exsecretario xeral do PSdeG preguntou aos "señores do Partido Popular" se están de acordo nunha serie de medidas do Executivo de Sánchez relacionadas cun "cinto protector de defensa dos dereitos dos máis débiles".
Por E.P. | SANTIAGO DE COMPOSTELA | 08/06/2023 | Actualizada ás 14:31
O PPdeG acusou ao deputado do PSdeG Gonzalo Caballero de "dar autobombo ao 'sanchismo" en comisión parlamentaria, por unha iniciativa coa que este quería forzar "o recoñecemento por parte da Xunta da importancia das medidas postas en marcha polo Goberno de España orientadas ao incremento dos ingresos da maioría social da cidadanía galega".
Pola súa banda, o BNG ironizou con que a intervención de Caballero lembroulle ás medallas que se puña o ilusionista Màgic Andreu cada vez que acababa un dos seus trucos.
En concreto, foi na comisión de economía na que o socialista preguntou aos "señores do Partido Popular" se están de acordo nunha serie de medidas do Executivo de Sánchez que relacionou coa necesidade dun "cinto protector de defensa dos dereitos dos máis débiles" na comunidade. "É positivo para Galicia?", interrogou á bancada do PP en numerosas ocasións.
Gonzalo Caballero é ex secretario xeral do PSdeG e en días pasados púxose a disposición do partido para "endereitar o rumbo" e afrontar as eleccións xerais do próximo 23 de xullo sen "retrocesos".
Este xoves, na Cámara autonómica, criticou que o PP votou "non" a "todos estes temas" relacionados con pensións, entre outras cuestións, polo que atribuíu ao grupo maioritario o "modelo de pór pau nas rodas". "Este domingo vén o señor Feijóo a Galicia, ten que vir aquí a comprometerse a rectificar", incidiu.
BNG E PP CRITÍCANO
Por parte do BNG, Ramón Fernández Alfonzo mostrou a súa "sorpresa" por esta proposición non de lei e, aínda que constatou que o PP "adoita facelo", dixo que esta proposta "está a outro nivel". No que ao seu grupo respecta, censurou a actuación do Goberno de Sánchez en canto a medidas como as pensións, ao entender que está "a profundar na liña do PP".
Mentres, a popular Noelia Pérez interpretou que o "relato" de Gonzalo Caballero "recolle medidas que pola propia teimosía do 'sanchismo' tiveron pouco efecto para as familias, que están a ser incompletas con contías insuficientes e orfas doutras medidas".
"Teño plena confianza en que o Goberno que salga das urnas, ese novo Goberno que vai saír, a diferenza do de Sánchez, desenvolverá medidas distributivas e con perspectivas de futuro", prognosticou.
